D: Suliffimmut atatillugu inigisap tigusinnaanera ajornannginnerusariaqarpoq
![](/sites/default/files/styles/image_934x467/public/article_images/blokmedflag_630.jpg?itok=exTLIqaq)
Demokraatit isumaqarput ikinngitsut suliffik nuannarinngikkaluarlugu tassani suliinnartartut inigisartik annaajumanagu.
Maanna Demokraatit Inatsisartuni ilaasortaatitaat Andreas Uldum siunnersuuteqarpoq ajornannginnerulersinneqassasoq suliffimmut atatillugu inigisap naliginnaasumik attartukkatut inigilersinnaanissaa. Taassuma siunnersuutigaa suliffimmut atatillugu inigisap ukiuni pingasuni najugarereernerani naliginnaasumik attartukkatut inigineqarsinnaalernissaa, ullumikkut malittarisassat malillugit ukiut arfineq marluk najugaqareernermi aatsaat taama pisoqarsinnaaagaluartoq.
- Sulisoqartariaqarpugut tunniusimasunik taamaattumik aamma najugaat sakkugalugu qilersorsinnaanngilagut, Andreas Uldum siunnersuummini tunngavilersuivoq.
Taanna isumaqarpoq inigisat nammineq pigilernissaannuta alloriarnerussasoq.
- Siunnersuut manna iluaqusiisussaavoq aallaqqaasiutigalugu suliffimmut atatillugu inigisamut naliginnaasumik attartortunngornissamut kingusinnerusukkut pisiarisinnaanngorlugut, Andreas Uldum oqarpoq.
Siunnersuut siullermeerlugu Inatsisartuni suliarineqassaaq marlunngorneq maajip arfineq aappaat.