Norca: Cubamut ajugaareernermi VM-mut anngussinnaaneq suli neriunarnerulerpoq

Nuummi timersortarfissuaq Inussivik marlunngornermi unnukkut pikkusuffioqaat kalaallit arnat assammik arsartartut Cuba unammimmassuk.

Cuba ataasinngornermi Mexicomut aallartinnerlioreerluni akiuulluarpoq arlaleriarlunilu siuaqqasarluni.

Kalaallilli tamanna namminneq iluaqutissaminnut allanngortippaat unammineq naammassimmat 25-19-mik ajugaallutik.

- Misigisarput nassuiarpiarsinnaanngilaralunniit pikkunaruttormat, kalaallit anføreriat Ivaana Holm KNR-mut oqarpoq.

- Ukiut marluk matuma siorna USA-mi anngunniutereerluta maannakkorpiaq pisussaq piareersarfigalugu sungiusarnikuuvugut. Assorujussuaq pikkunarpoq piareersaativut eqquutsissinnaagatsigit, Ivaana Holm oqarpoq.

Cubali mannginaarneqarpoq.

Isiginnaartugissaaqisut

Kalaallit nukissaqarluarlutik unamminermi målinik arfinilinnik ajugaapput taamalu pointinnattaatik marlunnik ilallugit.

- Aallartikkatta pissanganeq malugaarput. Qujanartumilli unamminerup naalernerani aqutsisuulerpugut. Tamatta kukkussuteqarsinnaasarpugut, kisianni aamma nukittoqqutaavoq tamakku nakkaannassutiginagit ingerlaqqissinnaaneq. Tamanna assorsuaq iluaqutigaarput, Ivaana Holm oqarpoq.

Inussivik nippassimaarfioqaaq isiginnaartut aappalaartunik atisalersorsimallutik suaartaqisut arsarfimmiittunut illersuilluaqalutik.

- Isiginnaartutsinnut qujassutissaqaqaagut. Taakkuupput nukissamik tunioraasut. Misigisaq oqaasertalerpiarsinnaanngilaraluunniit aamma uatsinnut qanoq pingaaruteqartigisoq eqqarsaatigalugu, Ivaana Holm oqarpoq.

Unamminerup aappaani Canada USA-mut ajugaavoq.

Unamminerit aallarniutaasut naammassippata inissilluarnerit marluk finalemi unammissapput iligiillu ataatsit VM-ip naggataarneqarnissaanut Skandinaviami pisussamut anngutissallutik

Ullumikkut unamminissat:
Nal. 17.30 Mexico – Canada
Nal. 20.00 Kalaallit Nunaat - USA