Norca: Kalaallit illersorluarneqarlutik Canada ajugaaffigaat

Nipiliorfioqisumi illersuisullu aappalaartunik qapilaatilinnik atortupassuit Nuummi timersortarfissuarmi Inussivimmi kalaallit arnat assammik arsartartartut VM-mut anngunniunneq Norca ataasinngornermi aallartippaat.

Kalaallit Canadamut 30-19-mik ajuaapput taamalu unammersuarnermi unamminerit aallarniutaasut naammassippata inissilluarnerit marluk finalerfigisassaanni pointit siulliit marluk qulakkeerlugit.

- Avatangiiseq tupinnaannartoq iserfigaarput illersorneqarneq sinnattorinikuunngisaq misigalugu, kalaallit arnat sungiusaasuat Anders Friis KNR-mut oqarpoq.

- Aamma kissaatigisatsitut unammineq ingerlapparparput arsartartut tamarmik isertut takutitsilluarmata. Tamanna assorujussuaq nuannaarutigaarput, Anders Friis oqarpoq.

Ataasinngornermi unamminermi siullermi Cuba aamma Mexico unammimmata Cuba ajugaassangatinneqaraluarpoq. Mexicomiulli allatut perusupput 32-26-millu ajugaallutik. Ullumi marlunngornermi kalaallit Cuba unammisussanngorpaat.

Oqaluunniarneq ajornakusoortoq

Tassani ajugaasinnaagunik finale qanilliallaqqissavaat.

- Unamminerit ataasiakkaarpavut. Cuba ullumi unammissavarput. Taava tamanna aallaavigissavarput. USA-mut Mexicomullu unamminissat suli eqqartulinngilagut, Anders Friis oqarpoq.

Inussivimi isiginnaartorpassuit nuannallutik nipiliorput suaartarlutik allatullu nipiliorlutik. Taamaattumik oqaloqatigiissinnaaneq ajornarluinnarpoq.

- Tamanna piareersimaffigereerparput. Pisussat assigiinngitsut ussersuutitaqartippavut aammalu ilisimatitsissutinik ingerlateqqiisarneq iluatsilluarlugu, Anders Friis oqarpoq aammalu unnugu Cubamut nalunaaqutaq 20.00 unamminissami isiginnaartut tapersersueqqinnissaat qilanaaralugu.

- Tassa qanorsuaq nipiliorusukkunik takanna, Anders Friis oqarpoq.

Ullumi unamminissat:
Nal. 17.30 Canada – USA
Nal. 20.00 Kalaallit Nunaat - Cuba

Unamminerit KNR2-mi isiginnaarneqarsinnaapput.