Cubami isummanik siaruarteriniat mianersoqquneqaraluarlutik suiaqatiminoortunik ingerlaaqatigiisitsisut
Inuit pisinnaatitaaffii pillugit isummanik Cubami siaruarteriniat suiaqatiminoortut illoqarfiit pingaarnersaanni Havanami akuerineqanngitsumik ingerlaaqatigiinnissaannik aaqqissuussivoq. Inuit suiaqatiminoortartut pillugit isummanik siaruarteriniat nunap naalakkersuisuinit kommunistiusunit mianersoqquneqaraluarlutik ingerlaaqatigiisitsipput.
Cubamiut 100-nit amerlanerusut erfalasunik neriusaap qalipaataanik qalipaatilinnik tigummiarlutik Cuballu assigiinngisitaarfiusuunissaanik nilliasarlutik Havanami ingerlaaqatigiipput,
Isummanik siaruarteriniat Havanap naatsiiviliarsuanit Parque Centralimit umiarsualiviup tungaanut kilometeri ataaseq ingerlaaqatigeereerlutik politeerpassuarnit unitsitaapput.
Isummanik siaruarteriniat ikinnerpaamik pingasut tigusaapput, allallu ingerlaaqatigiinnissamut akuersissuteqannginnamik ingerlaaqatigiikkunnaaqquneqarlutik.
Isummanik siaruarteriniat ilaatigut Facebookkikkut WhatsAppikkullu ingerlaaqatigiinnissamut peqataanissamik kaammattuisimapput.
Kinguaassiuutinik ilinniartitsinermik qitiusumik ingerlatsiviup Cenesexip suiaqatiminoortunik uumissuinermut akerliussutsimik takutitsilluni ukiumoortumik ingerlaaqatigiisitsisussaanerminik taamaatitsinerata kingorna taamaaliorput.
