Coronap Tasiilami juullip ingilii piffissaq kingullerpaaq atorlugu allamik pilersaarusiortariaqartikkai

Tasiilami katersortarfimmi aqagu unnukkut juullisioqatigiinnermik aaqqissuussisoqanngiinnassaaq.

Kommuneqarfik Sermersuup katersortarfik coronamik tunillatsissimasoqarnera pissutigalugu matuaa. Tamanna pissutigalugu Frederik Hessellundip Martin Lyngsdalillu akissaatikitsunut juullisoqatigiinnissamut aaqqissuussisarnerat tallimassaanik aaqqissuunneqartussaagaluartoq taamaatiinnarneqarpoq.

- Uggornartorujussuuvoq, Frederik Hessellund oqarpoq.

- Inuit nuannaartut takunissaat qilanaarutigigaluarparput – maannali inuit namminneq angerlarsimaffimminni juullisiuinnassapput. Corona tikeraartutsialaaneq ajorpoq.

Nerisassanik poortukkanillu ullup qeqqanit aallertoqarsinnaasoq

Juullimut aaqqissuussineq kommuni suleqatigalugu nalinginnaasumik aaqqissuunneqartaraluarpoq – Frederik Hessellundili Martin Lyngsdalilu allatut maanna pilersaarusiortariaqalerput:

Inuit nerisassanik poortukkanillu kantiinamut maannamit ullullu sinnera aallersinnaapput. Taakku angerlaallugit imminni juullisorsinnaassasut, Frederik Hessellund oqarpoq.

- Juullip inua poortukkanik pajulluni maaneeqqammerput, taamaammat taakku piareerput.

- Kantinamit ilaqutariinnut nalunaaqutaq 13.00-ip missaani aamma sianeqattaalissaagut.

AAMMA ATUARUK Juullip inngilii Tasiilami nammineq pissaqanngitsunut juullisiortitsiniartut

Katersortarfimmi inuit 50-it missaanniittut juullimi nerersuarnissamut periarfissaqanngitsut tamarmik juullisioqatigiinnissaannut inissaqaraluarput.

Taakkunannga 50-init 30-t meeraasussaagaluarput.

- Ukiuni kingullerni inuit kusanarluinnartunik atisalersorlutik qilanaarlutik takkuttartut takusarpagut, Frederik Hassellund oqarpoq.

Frederik Hassellund Tasiilami Alivarpimmi perorsaasuuvoq.

Aaqqissuussiniarannguatut aallartittoq

Martin Lyngsdal Tasiilami kantiinami igasuuvoq, taassumalu ilaqutariinnik juullimi qaaqqusinissaq ukiut arlallit matuma siorna suliniutigaa.

Katersortarfimmi juullisioqatigiinnissamik aaqqissuussineq aaqqissuussiniarannguatut aallartippoq. Kommuneqarfik Sermersuulli Tasiilami pisortaata, Hjørdis Vibergip oqarnera naapertorlugu aaqqissuussineq taanna piffissap ingerlanerani anneruleriartorpoq.

- Imaanngilaq pisariaqartitsisoqarneruleriartuinnarpoq, kisianni katitigaalluartoq taassuma nailerpaa. Aaqqissuussinerlu tullissaanimut anoq pitsaanerulersinneqarsinnaanersoq eqqarsaatigineqartarpoq.

Coronalli tamanna ukioq manna aporfilerpaa.