Juullip inngilii Tasiilami nammineq pissaqanngitsunut juullisiortitsiniartut

Juullisunnitsunik nerisassaqassaaq, kaageeraqassaaq immaqalu juullip inua meeqqanut tunissutissanik nassarluni aqqusaassalluni.

Juullip inngilii Martin Lyngsdal aamma Frederik Hessellund kommune suleqatigalugu Tasiilap katersortarfiani inunnut 50-inut namminneq juullip persuarsiutiginissaanut periarfissaqaanngitsunut nerisassanik juullisunnitsunik sassaalliissamaarput, alianaarsaartitsillutillu poortukkanik agguaassallutik.

Inuit 50-it ilaat 30-t meeraapput.

- Ukiuni kingullerni inuit assuarlutik kusanaqisunik atisaqarlutik aggiasarput tamannalu qilanaareqaarput, Tasiilami eqeersimaartut ilaat Frederik Hessellund oqarpoq.

Taanna Tasiilami Alivarpimmi perorsaasuuvoq.

AAMMA ATUARUK Tasiilarmiut imminnut paarinissaminnik neriorsoqatigiittut

Ukiut arlallit matuma siorna Martin Lyngsdal, kantiinami igasuulluni juullimi ilaqutariippassuarnik qaaqqusinissaq isumassarsiaraa, taannali nammineq inuttut tusagassiuutitigut saqqummerusunngilaq, meeqqat alianaarsaarsinnaanissaat anguniarneqarmat.

- Nalunngilara meeqqat nuannersumik juulliararsiornissaat Martinip assut pingaartikkaa. Uangami aamma pingaartippara. Martinip isumassarsiaralugu aallartitaa kusanaqimmat tapersersorusuppara.

- Taamaammat unnussiuaarnermi meeqqat pingaartinneqarnissaat kissaatigaarput. Meeqqammi nuannaarlutik juullisiornissaminnik pisariaqartitsisut uagut ikiorsinnaagatsigit, Frederik Hessellund oqarpoq.

Juullip inua kasuttorniartoq

Katersortarfimmi juulliararsiornissaq aliannaarsaarfiussaaq, aammami nerisassat, mamakujuit poortukkallu saniatigut nuannarineqartumik pulaartoqassammat.

- Nerereerutta mamakujuttutorlutalu kaageerartorlutalu aliannaarsaassaagut, meeqqallu decembarip ulluisa 24-ani tusissutissarsissammata uullisiutinik erinarsuutaa juullip inua isissaaq, Frederik Hessellund oqarpoq.

- Decembarip 24-anni meeqqat nuannisaarnissaat pingaartipparput, inersimasut uagut allatigut nuannisarsinnaagatta.

Tasiilap katersortarfiani juullisiortarnerit mikisunnguullutik aallarteriarlutik, Kommuneqarfik Sermersuumi immikkoortumi pisortaq Hjørdis Viberg naapertorlugu, unnussiuaartarneq alliartuinnavippoq. Imaanngikkaluarpoq pisariaqartitsisut amerliartormata alliartortoq, kisianniuna ukiut tamaasa pitsaaanerulertarmat alliartortoq.

- Isumaqarpunga aaqqissuisut peqataasartullu assigiimmik qilanaartut. Tamatta naligiilluta katerisimaartaratta iluatsittarpoq, Hjørdis Viberg KNR-imut oqarpoq.