Coronap ilungersuatitsinerata Air Greenlandip siunissamut pilersaarutai sukkatsisikkai
Air Greenland 1960-imi pilersinneqaramili ineriartuinnavissimavoq. Tassa imaappoq timmisartuutileqatigiiffik ukiut tamaasa annikitsumik ineriartortarpoq, coronali siorna iluatitsilermat timmisartuutileqatigiiffiup ingerlatsinermut tunngaviata ilarujussua atuukkunnaarpoq.
Tamanna unammillernartoqartitsingaatsiarpoq, taamaakkaluartorli suliffeqarfiup qanoq ingerlanneqarnissaanut eqqarsaatertuuteqaqqinnissamut aamma periarfissiilluni. Timmisartuutileqatigiiffiup pisortaa, Jacob Nitter Sørensen, KNR-imut taama oqarpoq.
- Assersuutigalugu angalaniartoqassuseq aallaavigalugu timmisartuussinissamut qanoq pilersaarusiortarnitsinnut isumalluuterpassuit siusinnerusukkut atortaraluarpagut, tamanna allaanerusumik aaqqiissuteqarfigissavarput, pisortaq oqarpoq, nangillunilu:
AAMMA ATUARUK Suliniutit pingasut Air Greenlandip 2020-mi angusaanut sunniuteqarluinnartut
- Angalasoqarpallaannginnerani isumalluutit atorluarnissaat ukkatarinerungaatsialerparput. Ukiuunerani qaammatini takornariaqarnermik ingerlatsinerunissamut tunngassuteqarpoq – tassa isumalluutinik ukioq kaajallugu atuilluarnissaq.
Billetsit nutaat
Air Greenlandip assersuutigalugu billetsit aappaluttut qorsuillu atorunnaarlugit billetsinik tuniniaariaatsimik nutaamik periarfissaqartitsinerusumik taarserppaa.
Coronap ilungersuatitsinerata nalaani oqartussanit peqqussutit nutaat pissutigalugit ullualuinnarnik periarfissaqarfiusumik angalanissanik taamaatitsiinnartoqartariaqartarpoq.
AAMMA ATUARUK Air Greenland matusineq pillugu: Timmisartukkut angallanneq erngertumik unitsinneqarpoq
- Inuit billetsiminnik allannguinissamut taamaatitsiinnarnissamullu periarfissaqarnissaq piariaqartissimavaat. Tamanna pissutsit uagutsinnut sukkasuumik iliuuseqartariaqartitsisarnerannut assersuutissaavoq, pisortaq oqarpoq, taassumalu allanngortitsisinnaassuseqarneq attatiinnarniarpaa.
Unnuami timmisartuussisarnikinnerulissasoq
Air Greenlandip tamatuma saniatigut unnuaanerani timmisartuussisarnerit arlallit unitsillugit ualiunerani timmisartuussinerusarnissaq ukkatariniarpaa.
- Ataasinngornermi, pingasunngornermi tallimanngornermilu unnuakkut timmisartuussisaraluarpugut, tassanilu timmisartumut ilaaniartut inissaqartikkumallugit timmisartorsuaq Airbus Norsaq Københavnip Kangerlussuullu akornanni marloriaammik angalasaraluarluni. Unnuaaneranili angallassinerit aningaasartuutaangaatsiarput, tamanna siunissami allatut aaqqiissuteqarfigisalissallutigu naatsorsuutigaara, pisortaq oqarpoq.
Assersuutigalugu ulluunerani timmisartuussinerit amerlanerusinnaapput imaluunniit piffissami angallattoqaleruttorfimmi allanit ikiortilluni timmisartuussisoqartarsinnaassasoq, Jacob Nitter Sørensen nassuiaavoq.
