Coronap ajornartorsiortitsinera: Naalakkersuisut 2,5 milliardit koruunit tungaannut atorniartut
Coronap ajornartorsiortitsinera nunatsinnut eqquivoq, nunatsinnilu suliffeqarfiit qassiusut aningaasatigut eqqugaallutik.
Coronap ajornartorsiortitsinerata qanoq sivisutigissanera apeqqutaalluni Naalakkersuisut nunanut allanut 2,5 milliadit koruunit tikillugit atorniartariaqalersinnaapput. Tamanna suliffeqarfiit akiliisinnaajunnaannginnissaannut nunattalu ataatsimut aningaasaqarneranut qulakkeerutaassaaq.
Aningaasaqarnermut naalakkersuisoq, Vittus Qujaukitsoq (NQ) tusagassiortunik katersortitsinermi taama nalunaaruteqarpoq.
AAMMA ATUARUK Coronakrise: Air Greenland lukker ruter og aflyser afgange
- Naatsorsuinigut naapertorlugit coronamik akiuiniarnermi innuttaasunullu nalinginnaasumik kiffartuussinermi aningaasartuutissaqarniarneq pissutigalugit atornissaq pisariaqalersinnaavoq. Aningaasat qanoq annertutigissanersut coronap ajornartorsiortitsinerata qanoq sivisutigissanera annertutigissanera apeqqutaapput, Vittus Qujaukitsoq oqarpoq.
- Ajornartorsiortitsinera sivisuneruguni, nunatsinnut tamanut akeqarnerussaq. Qaammatit pongasuugunik, arfiniliugunik, aqqaneq-marluugunik qaammatilluunniit qassiiugunik suliffissaaleqisoqarnerunissaa, akileraartukinnerunissaa ikiorsiissuteqarnissamullu aningaasartuuteqarnerunissaa naatsorsuutigisariaqarparput.
Sipaarniartariaqarnerit
Naalakkersuisut nunatta aningaasanik atorneratigut erniat akilersuutillu qanoq naleqassanersut misissorlugit aallartinneqareerut Naalakkersuisup oqaatigaa.
Nunarput 230-it 250 millionit koruunillu missaannik maanna akiitsoqarpoq, tamannalu nunatta ataatsimoortumik aningaasaqarneranut sanilliukkaanni annikitsunnguusoq, Vittus Qujaukitsoq oqarpoq.
Naalakkersuisuni politikerit tamatuma saniatigut ukioq manna aningaasanut inatsimmi sumi sipaaniartoqarsinnaanera misissorpaat. Taakkuttaaq aningaasartuutit annikinnerutinniarlugit 2021-mut aningaasanut inatsimmi qanoq sukaterisoqarsinnaanera misissorpaat.
AAMMA ATUARUK Coronap ajornartorsiortitsinera nunatta aningaasaqarneranut kingunerlungaatsiassasoq
Nunatsinni pilersaarutinik suliniutinillu suliffissaqartitsisunik atatitsiinnarnissaq ukkatarineqassaaq.
”Pilersaarutit pisariaqannginnerusut” Vittus Qujaukitsup oqarnera naapertorlugu kinguartinneqanngikkunik taamaatiinnarneqassapput.
Naalakkersuisut inuussutissarsiuteqartunut ikiorsiissutinik milliardit koruunit affaannik aningaasartaqartunik qaammat ataaseq sinnerlugu matuma siorna pilersitsipput. Taamaakkaluartorli aalisarnermik takornariaqarnermillu attassiinnarnissamut ikiorsiissutinik allanik pilersitsisoqarnissaa pisariaqarnera eqqartorneqarnikuuvoq.
Tamatumunngali maanna pilersaaruteqartoqarpasiganilu nutaanik ikiorsiissuteqartoqartussaarpasinngilaq.
- Ikiorsiissutinik aasap tungaanut atuuttussanik pilersitsivugut. Aasap kingorna qanoq pisariaqartitsisoqassanersoq piffissami tassani takujumaarparput. Angallannerup kinguariarfiunissaa, takornariaqarnerup eqqugaanissaa, aalisakkat akiisa appariartornissaat naatsorsuutigisariaqarput. Nunatta aningaasaqarnera matumani eqqugaassaaq, tamanna qularutissaanngilaq, Vittus Qujaukitsoq oqarpoq.
