Coronamik tunillatsissimasumik Uummannami uppernarsaasoqareernerani 57-iinnaat atuariartortut
Uummannami innuttaasorpassuit coronavirusimik tunillatsissimasoqarneranik sapaatit akunnerata siuliani paasinnittoqareersoq ernumapput.
Tamannalu angajoqqaat meeqqaminnik angerlarsimatitsiinnarneranik kinguneqarpoq.
Meeqqallu taamaallaat 57-it tunillatissimasoqartoq pillugu nalunaartoqarnerata aqaguani atuariartorput.
AAMMA ATUARUK Uummannami inuit ikinnerpaamik qulit tunillatsissimasumik uppernarsaasoqareernerani angerlarsimaannartut
Uummannamilu Edvard Krusep atuarfiata pisortaa ernumasoqarneranut paasinnilluarsinnaavoq. Angajoqqaalli meeqqaminnik atuariartortitsisassasut kaammattuutigaa.
Suliaq naatsumik:
Peqqinnissaqarfimmi sulisoq covid-19-imik tunillatsissimasoq sapaatip-akunnerata siuliani sisamanngornermi uppernarsarneqarpoq.
Tunillatsissimasoq Danmarkimit tikissimavoq, taannalu Uummannamut tikinnerminit ullut arfineq-marlussaanni misissortippoq.
Misissuinermi tunillatsissimasoq paasineqarpoq. Tunillatsissimasumillu Uummannami aatsaat siullerpaamik uppernarsaasoqarluni.
Inuit ikinnerpaamik qulit angerlarsimaannarallartussanngortinneqarput.
Tunillatsissimasup qanillisimasai tamarmik arfininngormat misissorneqarput. Misissugassat tamarmik Ilulissat misissuisarfimmi misissorneqarput, taakkulu tamarmik tunillatsissimanngillat.
- Atuartuni 198-ini taamaallaat 57-it Uummannami tunillatsissimasoqanera pillugu nalunaaruteqartoqareerneranit ulluni tulliuttuni atuariartorput, Uummannami atuarfiup Edvard Krusep pisortaa, Tim Arnoldi oqarpoq.
- Angajoqqaat meeqqatik angerlarsimatissalugit aalajangerput, pisumullu nalornigamik taama aalajangernerat immaqa pissusissamisuuginnarpoq. Uummannamimi aatsaat tunillatsissimasoqarpugut, Tim Arnoldi oqarpoq.
Tunillatsissimasoq napparsimmavimmi sulisuusoq
Uummannami napparsimmavimmi sulisoq coronavirusimik tunillatsissimasoq sapaatit akunnerata ataatsip matuma siorna paasineqapoq.
AAMMA ATUARUK Politiit: Uummannamut tunngatillugu angerlarsimaannaarnissamik unioqqutitsisoqanngilaq
Tunillatsissimasorlu illoqarfik qimallugu maanna aallareerpoq. Atuartorpassuilli suli atuariatunngillat.
- Atuariartortartulli amerliartorput, ataasinngornermimi atuariartortut 112-iupput, atuarfiup pisortaa oqarpoq.
Atuartullu ilaat sapaatit akunnerat ullumi qaangiuttoq suli atuariartunngillat.
- Atuariartortartut amerliartortut takusinnaavarput. Kisianni meeqqat 60-it 70-illu akornanniittut suli amingaataapput.
AAMMA ATUARUK Malittarisassat nutaat: Nunatsinni peqqinnissaqarfimmut suliartortut tikereernermini coronamut misissortittassapput
Atuarfiullu pisortaa angajoqqaat ernumassuteqarnerannik paasinnilluarpoq. Meeqqalli atuariartornissaat isumagissagaat kammattuutigaa.
Atuarfik nappaammik siaruatsaaliornissaaanut iliuuseqarpoq. Atuartummi atuarfimmilu sulisut kisimik atuarfimmut januaarip ulluisa 29-iata tungaanut iseqqusaapput.
