Uummannami peqqinnissaqarfimmi suliartortumut, covid-19-imik tunillatsissimasumut tunngatillugu angerlarsimaannarnissamik maleruaqqussummut unioqqutitsisoqanngilaq. Kalaallit Nunaata politimesteriat, Bjørn Tegner Bay taama uppernarsaavoq.

- Uummannami pisumut tunngatillugu suliaq naammassereerparput, politimesteri KNR-imut mailikkut paasissutissiivoq, itisiliillunilu:

- Oqaatigisinnaavara misissueqqissaarnermi paasivarput, pineqartoq immikkut akuerisaalluni suliartortinneqarmat. Taamaammat angerlarsimaannarnermut maleruaqqusissummik unioqqutitsisoqanngimmat, pineqartoq unioqqutitsinngilaq.

AAMMA ATUARUK Naalakkersuisut: Uummannami tuniluuttoqarneranik takussutissaqanngilaq

Bjørn Tegner Bay oqarnera naapertorlugu, nunatsinnut nunatsinnilu angalanerni nalunaarutinik ataasiinnaanngitsunik immikkut akuersissuteqartoqarpoq.

Tassalu pineqartoq immikkut akuersissummik tunineqarnermigut coronamut misissorteqqaanngikkaluarluni Uummannap napparsimmaveqarfianut suliartorsinnaatitaasoq taassuma innersuussutigaa.

Peqqinnissaqarfimmut suliartortoq Danmarkiminngaaneerpoq

Taassuma Danmarkimiit Uummannamut tikinnerminit ullut arfineq marluk qaangiunneranni misissortinnermini coronamik tunillanneqarsimasoq paasineqarpoq.

Taanna sapaatit akunnerata siuliani sisamanngormat tunillanneqarsimasoq paasineqarmat, inuit qulit ikinnerpaamik angerlarsimaannaqqusaapput.

AAMMA ATUARUK Uummannami inuit ikinnerpaamik qulit tunillatsissimasumik uppernarsaasoqareernerani angerlarsimaannartut

Taakku tamarmik coronamut misissortikkamik tamarmik tunillatsissimanngillat. Naalakkersuisoqarfik tusagassiutinut sapaammi taama paasissutissiivoq.

Pineqartoq Uummannamiit aallareersoq, nunatta nakorsaanerata ilanngullugu ippassaq oqaatigaa.

Taannalu sumunnarnersoq paasissutissiissutigerusunngilaa.

- Sulianut ataasiakkaanut tunngatillugu oqaaseqarsinnaanngilagut, Corona pillugu aqutsisoqarfimmi pisortaq, Hans-Peder Barlach Christensen oqarpoq.