Uummannami inuit ikinnerpaamik qulit tunillatsissimasumik uppernarsaasoqareernerani angerlarsimaannartut
Covid-19-imik tunillatsissimasumik uppernarsaasoqarnerata kingunerisaanik inuit qassiiusut angerlarsimaannartussanngortinneqarput.
Nakorsaaneq, Henrik L. Hansen paasissutissiivoq.
- Inuit qulit angerlarsimaannartussanngortinneqarput, nakorsaaneq KNR-imut oqarpoq.
Tunillatsissimasutut uppernarsarneqarsimasut ima amerlatigipput: 30
Peqqisseqqissimasutut nalunaarutigineqarsimasut ima amerlatigipput: 29
Paasissutissarsiffik: Nakorsaaneqarfik
Tunillatsissimasutut uppernarsarneqartoq peqqinnissaqarfimmi sulisuuvoq, Henrik L. Hansenillu napparsimasut ataasiakkaat angerlarsimaannartussanngortinneqarnerarpai, taakkunanngali ”peruluttoqanngitsoq” oqaatigalugu.
Tunillatsissimasup Danmarkimit Uummannamut tikinneranit ullut arfineq-marluk qaangiuttut tunillatsissimasutut uppernarsarneqarpoq.
Tamanna pissutigalugu politiit nakorsaaneqarfiullu tunillatsissimasup Uummannamut ingerlaarnermini Uummannamilu qanillisimasai paasiniarpaat.
Corona pillugu allattoqarfiup qanillineqarsimasut tamarmik nassaarineqarsimasut, taakkulu tunillaassueratarsinnaanerat pinaveersaartinniarlugu angerlarsimaannaqquneqartut paasineqarput. Tunillaassuisoqalersinnaanissaali ”ilimanarpallaanngitsutut” nalilerneqarpoq.
Tunillatsissimasoq sulisimanersoq nalunartoq
Henrik L. Hansenip tunillatsissimasutut uppernarsarneqartoq ulluni arfineq-marlunni sulinermini Uummannamiinnermini sulisimanersoq oqaatigisinnaanngilaa.
- Suliat tamaat erseqqissarneqaqqaassaaq, taamaammat politiit malittarisassat ilaannik unioqqutitsisoqarsimanersoq aalajangiiffigissavaat, nakorsaaneq oqarpoq.
AAMMA ATUARUK Covid-19-imik tunillatsissimasumik Uummannami uppernarsaasoqartoq
Virusi allaanerusoq nutaaq Tuluit Nunaannit aallaaveqartoq piffissami kingullermi oqallisigineqangaatsiarpoq. Taanna tunillaassuutilertorneruvoq, coronavirusimiilli ”nalinginnaasumit” ulorianarnerunngilaq.
Tunillatsissimasoq qanoq ittumik tunillaasimanersoq suli oqaatigineqarsinnaanngilaq.
- Tamanna suli misissuiffiginngilarput. Misissuineq Københavnimut nassiutissavarput, tamatumali akissutersinissaa sivisujaartarpoq, Henrik L. Hansen oqarpoq.
