Covid-19-imik tunillatsissimasumik Uummannami uppernarsaasoqartoq

Coronamik tunillatsissimasumik aatsaat siullermeertumik Uummannami uppernarsaasoqarpoq.

Tunillatsissimasoq Danmarkimiit Uummannaliartuuvoq, taassumalu tikinneraniit ullut arfineq-aappaanni paasineqarluni.

- Angalanermini Uummannamiinnerminilu qanillisimasaanik tamanik tunillatsittoqarsimasinnaaneranik misissuineq tamakkiisoq aallartinneqarpoq.

Naalakkersuisut Facebookikkut allapput.

- Qanillisimasinnaasai tamarmik nassaarineqarput aammalu tuniluuttoqalersinnaanera pinngitsoortinniarlugu angerlarsimaannaqqullugit ilisimatinneqarput. Uummannami innuttaasut akornanni tuniluuttoqalersinnaanera annikitsuaraasoq naliliisoqarpoq.

Tusagassiuutinut nalunaarut naapertorlugu corona pillugu allattoqarfiup angerlarsimaannartussaatinneqartut tamarmik ullumikkut attavigineqassapput tassanilu qanoq sivisutigisumik angerlarsimaannartussaanerat misissortinnissamullu periarfissaat pillugit ilisimatitsissuteqartoqassalluni.

- Piffissami aggersumi Kalaallit Nunaannut tikittussat amerlasussaapput. Piffissami tassani tunillatsissimasut arlallit tikinnissaat ilimanaateqartorujussuuvoq.

- 2021-mi januaarip sinnerani Kalaallit Nunaanni tunillaassuisinnaanerup ulorianartorsiorfiunera annertusingaatsiassaaq.

Suliami pisut misissorluarneqaleruttortut Corona pillugu allattoqarfiup KNR-imut nassuiaatigaa.