- Immikkut ittumik pisoqarneratigut, soorlu coronamik eqqortinnermi, ikiorsiigasuarnermut malittarisassat atorneqarsinnaapput, Mimi Karlsen nassuiaavoq.Assi: KNR

Coronamik eqqorneqarsimaguit: Aningaasatigut ima ikiorneqarsinnaavutit

Corona pissutigalugu sulisinnaasimanngikkuit, angerlarsimasussaatitaasariaqarsimaguilluunniit, taamaalillutillu isertitaqanngitsoortariaqarsimallutit, taava ikiorserneqarnissamut pisinnaatitaaffeqarputit.

- Ilaqutariit meerartallit coronamik eqqugaasut aningaasatigut kalluarneqarput. Allaammi eqqugaasut ilaasa meeqqamik nerisassarsinissaat akissaaruffigisimavaat.

Meeqqat Illersuisuat Aviâja Egede Lynge aggustip naalernerani tusagassiuutinut taama nalunaaruteqarluni ilisimatitsivoq.

Tamanna pivoq ilaqutariit meerartallit coronamik eqqorneqarnermik kingorna sulisinnaannginnerminni aningaasaqarnermikkut aamma kalluarneqartarsimanertik pillugu Meeqqat Illersuisuannut saaffiginnissuteqartalersimammata. 

Nunatsinnimi sumiiffinni assigiinngitsuni aasap ingerlanerani coronamik tunillatsittut amerleriarujussuarmata, inuit ilaquttaminnik peqateqarlutik angerlarsimasussaatitaasariaqarsimapput. Taamaalilluni ulluni arlalinni sulinani angerlarsimasoqartariaqartarsimavoq.

AAMMA ATUARUK Nuummi tunillatsissimasut amerlangaatsiarput: Ippassarmit 17-it tunillatsissimasut paasineqartut

Piffissarlu taanna akunnermusialinnut pikkunarsinnaavoq.

Isumaginninnermut sulisoqarnermullu naalakkersuisuisoq, Mimi Karlsen (IA), maanna ilisimatitsivoq corona pissutigalugu isertitaqarunnaartariaqarsimaguit ikiorserneqarnissarnut periarfissaqartutit.

- Oqartussat angerlarsimagallarnissaq piumasarippassuk imaluunniit nappaat pillugu mattusimanissaq innersuussutigippassuk, inuit eqqugaasut taamatut piumaffigineqarsimanerminnut uppernarsaammik pisinnaapput, taannalu uppernarsaat napparsimalluni nalunaarnertut isigineqassaaq. Uppernarsaat taanna kommunit suleqatigalugit sananeqarnikuuvoq, Mimi Karlsen KNR-imut ilisimatitsivoq.

Tamanna isumaqarpoq mattusimasussaatitaanermut imaluunniit angerlarsimasussaatitaanermut uppernarsaammik corona pillugu allatseqarfimmit pisoqassasoq.

Taannalu uppernarsaatigissavat piffissami tassani corona pissutigalugu sulisinnaasimannginnernut. Uppernarsaallu taanna aningaasatigut ikiorserneqarnissamut qinnuteqarniaruit kommunimut tunniutissavat.

Ikiorsiigasuarnerit

Uagutsinnut imaluunniit ilaquttatsinnut pilersuisinnaajunnaanitsinni ikiorserneqarnissatsinnut maani nunatsinni pisinnaatitaaffeqarpugut.

Tamannalu aningaasatigut ikiorneqarneruvoq, soorlu suliffeerunnermi ikiorsiissutinik pisinnaatitaaneq, Mimi Karlsen oqarpoq:

- Innuttaasut suliffimminnik paarsisinnaajunnaarallartut suliffeerunnermi ikiorsiissutinut piumasaqaatit Inatsisartut inatsisaanniittut naammassisimagunikkit ikiorneqarnissaminnut periarfissaqarput, Mimi Karlsen allappoq. 

Suliffeerunnermilu ikiorsiissutinik pisinnaanngikkuit pisortanit ikiorsiissutinik qinnuteqarsinnaavutit.

AAMMA ATUARUK Tamaat isigalugu: Coronavirus pillugu killiffik

- Immikkut ittumik pisoqarneratigut, soorlu coronamik eqqortinnermi, ikiorsiigasuarnermut malittarisassat atorneqarsinnaapput, Mimi Karlsen nassuiaavoq.

Meeraqaruillu, qanoq atugaqarnerit aallaavigalugu, meeqqanut tapiissutinik, meeqqanut tapinik imaluunniit inuuniarnermut ikiorsiissutinik ikiorneqarnissarnut pisinnaatitaaffeqarputit. 

- Ikiorsiisarnerup siunertaraa meeqqap ikiorneqarnissaa, Mimi Karlsen allappoq.

Mimi Karlsenip ilanngullugu ilisimatitsissutigaa inuttaasut mattusimaqqusaarnerminnut imaluunnit angerlarsimasussaatitaanerminnut oqartussanit uppernarsaammik piniarnerminnut kingullermik tuniluuttoqarnerani utaqqisariaqartarsimasut.

- Pisorli massakkut ajunngitsumik ingerlalernikuuvoq. Ulapaarnerup nalaani inuit 15-it uppernarsaammik amigaateqarsimapput, Mimi Karlsen allappoq.

Isummersuutit

Nunatsinni coronavirusi pillugu
killiffik

Tunillatseqqasut 126  
Ullumi tunillatsittut 35  
Siullermik kapitissimasut 40.955  
Aappassaa kapitissimasut 35.924  
Tunillanneqarsimasut 504  
Uninngasut 1  
Anersaartuuteqartitaasut 0  
Toqquteqartut 0  
corona.nun.gl-imi kisitsit takukkit  
   Nutarterneqarpoq: 
Septembarip 21-iat 12:00
 

Coronavirusimik tunillatsinissaq pinaveersaaruk