CNN: Korea avannarlermiut diplomatiat toqutaasorineqartoq uumavoq
Korea avannarliup USA-mut immikkut aallartitaa, Kim Hyok-chol, toqutaasimanngilaq.
Amerikamiut tv-qarfiat CNN marlunngornermi taama allaaserisaqarpoq. Korea avannarlermi atorfillit sisamat, ilaatigut Kim Hyok-cholip, pillarneqarlutik toqutaasimanerat Korea kujallermi aviisit anginerit ilaata Chosun Ilbop tallimanngormat allaaseraa.
Korea avannarliup siuttuata Kim Jong-unip USA-llu præsidentiata Donald Trumpip februaarip naalernerani ataatsimeersuarnerat pillaalluni toqutsinermut pissutaatinneqarpoq.
Illuatungeriit taamani isumaqatigiissuteqanngitsoorput.
Immikkulli aallartitap pillagaalluni toqutaasimanera CNN naapertorlugu eqqunngilaq. Taannami Korea avannarlermi oqartussanit nakkutigineqarpoq, tusarfiit atiisigut taaneqanngitsut arlallit CNN-imut taama ilisimatitsipput.
Aamma Sin Hye-yong, Kim Jong-unip Hanoimi ataatsimeersuartoqarnerani oqalutsigisaa, oqartussanit nakkutigineqarpoq. CNN taama allaaserisaqarpoq.
Tusarfik atiatigut taaneqanngitsoq pillaalluni toqutsisoqarsimaneranik aviisimi Chosun Ilbomi tallimanngormat issuaavigineqarpoq. Taamaattoqarsimanerali tusarfinnit pisortatigoortunit uppernarsarneqanngilaq.
Aamma diplomatit qullersat ilaata, Kim Yong-cholip, Kim Jong-unimut qanittumik inissisimajunnaarsitaasimanera tusarliunneqarpoq. Taanna pillagaalluni isumaliortaatsimik allannguinissaminut sungiusaqqittussanngortitaasimaneragaavoq.
Taamatulli pisoqarsimanera ilumuunngitsoq sapaatiummat assilisami takuneqarsinnaavoq.
Assilisami pisortatigoortumi ataasinngormat saqqummiunneqartumi takuneqarsinnaavoq Kim Yong-chol eqqumiitsulianik saqqummersitsinermi Kim Jong-unip eqqannguani nikorfasoq.
USA-p nunanut allanut tunngasunut ministeriata Mike Pompeop Chosun Ilbop allaaserisaa tunngavigalugu taamatut pisoqarsimanera misissuiffiginiarlugu oqaatigaa.
Korea kujallermili aviisip tusarliussai aamma qularineqarsimapput. Tusarfiup atiatigut taaneqanngitsup oqaatigisaata tunngavigineqarsimanerat tamatumunnga pissutaatinneqarpoq.
Korea avannarlermi siunnersortinik pillaalluni toqutsisoqarsimanersoq marlunngormat erseqqissumik suli paasineqanngilaq. Pisortatigoortumik uppernarsaasoqanngilaq.
/ritzau/
