USA-mi qinersineq 2016 Clintonip Trumpillu innuttaasut qinersivinnukaassoraat

Amerikami qinersineq aallartiinnaqaaq.

Demokraatit præsidentimut qinigassanngortitaat Hillary Clinton qinersisartunik isumasiuinerni siuaqqavoq, taamaakkaluartorli qinersinerup inernerisassaa suli nalunarpoq.

Københavnip Universitetiani ekstern lektoriusoq Mette Nøhr Claushøj taama oqarpoq.

- Amerikamiut 2/3-lii ataallugit qinersisoqartillugu qinersiartortarput, lektori oqarpoq.

- Taamaammat qinersisartunik isumasiuinerni siuaqqagaluarluniluunniit qinersiartortoqanngippat tamanna tatigineqarsinnaanngilaq.

Qinersiartunngitsoortoqarnissaalu ernumassutigalugu partiit marluusut qinersisartut qinersiartornissaat ilungersuutigalugu sulissutigaat.

Allaammi qinersisartut qinersivimmut angallatissallugit neqeroorfigaat, USA-mi pissutsinik ilisimasalik Anders Agner Pedersen, kongressen.com-imi aaqqissuisuusoq taama oqarpoq.

Taanna aamma oqaluttuarpoq Demokraatit Republikanerinut naleqqiullugit qinersisartut sioqqutsillutik taasitinnissaat iluatsilluaraat, tassalu ulloq qinersiffik sioqqullugu qinersereernissamik periarfissaq atortillugu.

- Kisitsisini maanna saqqummiunneqartuni takusinnaavarput early voting pissutigalugu (sioqqutsilluni qinersineq, aaqq.) Clinton naalagaaffinni pingaarutilinni nalunartunilu inissisimalluartoq, aaqqissuisoq taama oqarpoq.

- Taamaammat Trump republikanerillu ullumikkut qinersiffimmi qinersisartut qinersiartortinnissaannik sulissuteqarnissaat pingaartuuvoq.

/ritzau/