CIA pillugu misissuinissaq piumasariniarpaat

IA'p, Siumup, Demokraatillu uggoraat, CIA-p tigusanik Nunarput qulaallugu angallarssisarsimasinnaaneranik arlaannaannulluunnit attuumassuteqanngitsut misissuisinneqarnissaannik piumasaqaatertik, Danmarkimi partiit aappaluttunik taaneqartartut taamaatimmassuk.

Danmarkimi partiit saamerliit nunanut allannut tunngasunut politikkissartik saqqummiukkaat, Radioaviisimi ullaaq oqaatigineqarpoq, tassanilu CIA-p nunarput qulaallugu timmisartuussisarsimasinnaanerinik misissuinissaq ilaanngilaq.

Tamannalu Siumumeersup, Doris Jakobsenip uggoraa:

- Aappaluttunik qalipaatillit taamatut aalajangersimanerat soorunami tusarlugu ajuusaarnarpoq.

Folketingimi  amerlanerussuteqalersussat, CIA pillugu misissuisitsinissaq alajangiusimassagaat, Doris Jakobsenip neriuutigaa.

- Taamatut killiffeqarnermi allatut ajornartumik isumaqatigiinninniarneq ingerlanneqartarpoq, Doris Jakobsen oqarpoq.

Inuit Ataqatigiit Folketingimut qinigassanngortitaata, Sofia Rossenip aalajangiusimavaa, CIA-p tigusanik nunarput qulaallugu timmisartuussisarsimasinnaaneranik misissuisitsisinissaq, partiimi piumasarigaa.

Piumasaqaallu saamerliit naalakkersuisuutitaqalerpata taamaluunniit pinngippata pissasoq oqarpoq.

- CIA-mut tunngasut nalunaarutigisaat aallaavingalugit suleqatigisinnaanngilagut, kisianni allatigut suleqatiginissaat naatsorsuutingaara, Sofia Rossen oqarpoq.

Demokraatit folketingimut qinigassanngortitaat, Niels Thomsen, aamma ugguarpoq, aammali misissuisoqarnissaa alajangiusimallugu.

- Siumoortumik oqassalluni kikkut suleqatinginiarlugit mianernarami ugguuna soriarsinnaanerput killilertaratsingu. Uagut Demokraatini imatut perusuppugut siumoortumik oqarnianngilagut saamerliit talerpiilluunniit tapersersorniarlugit peqqutigalugu isumaqatigiinniarusukkatta kiffaanngissuseqarluta taava aamma tassuuni pinnatassarput annerpaajutinniarlungu, Niels Thomsen oqarpoq.

Atassutip Folkitingimut qinigassanngortitaata, Steen Lyngep nuannaarutigaa Danmarkimi partiit saamerliit illuanorluinnaq sangusimammata.

- Atassumminngaanniit nuannaarutigaarput aappaluttut isummaminnik allanngortitsisimammata, Steen Lynge oqarpoq.