VIDEO Chemnitz Narup Qujaukitsorlu soraarsitsinissat pillugit oqallittut
Borgmester Asii Chemnitz Narupillu naligiissaarinermik aaqqissuusseqqinneq pisuutippaa, Kommuneqarfik Sermersooq 2015-imi akiliutigisartakkami qaavisigut 54 millionit koruuninik akileeqqittussanngormat. Vittus Qujaukitsoq isumaqarpoq kommuni imminut qiviaqqaartariaqartoq aningaasatigullu aqutsinerliortoqarsimanera misissuiffigalugu.
- Naluneqanngitsutut Kommuneqarfik Sermersooq ukiorli immikkut sakkortusakkamik nakkutigineqalernikuuvoq aningaasatigut inissisimaffia ilungersunartumik inissisimammat, KNR-imut oqarpoq.
Aamma atuaruk Sermersuup atorfiit 75-it atorunnaarsippai
- Tassa isumaqanngilatit 54 mio. koorunit sumilluunniit attuumassuteqartut?
- Taanna kommunalbestyrelsip oqaaseqaateqarnissaanut utaqqivarput, aammalu manna tikillugu suli nassuiaataasunik aningaasanut inissisimaffiup ullumikkut inissisimanera pillugu Naalakkersuisunit suli tigusaqarnikuunngilagut, Vittus Qujaukitsoq oqarpoq.
- Oqaatigerusuppara uagut missingersuusiorluta aallartippugut 2015-imut, aamma tassani missingersuutit tunngaviusut ataasinngormat kommunalbestyrelsip ilaasortaanut saqqummiunneqarmata takuarput 57 millioninik 2015-imi amigartuussasugut.
Aamma atuaruk Inunnik isumaginninnermik suliallit sipaarniarnermi eqqugaassanngillat
- Vittus Qujaukitsup aggustip 20-iani 54 millioninik ilanngaaffigisimanngitsuugunitigut, taava soraarsitsissanngikkaluarpugut, Asii Chemnitz Narup oqarpoq.
- Taanna qularaara. Tassami kommuni nammineerluni ilassutitut aningaasaliissutai qiviarutsigit, taavalu ukiormannaannaq amigartoorutai katillugit 150 millionit aningaasartalinnik immikkut ittumik aningaasaliissuteqaqqittariaqarnikuupput.
- Taamaattumik taannarpiaq qiviaraanni kukkunersiuisullu uparuartuutaat, sumik peqquteqarnersoq paasisariaqarparput, tamannalu kommunimit nassuiaatiginissaa qilanaarivarput, Vittus Qujaukitsoq oqarpoq.