Borgmester Asii Chemnitz Narup KNR-imut taama oqaluttuarpoq.
- Siullermik oqaatigissavara ullumikkut ulloq assorujussuaq oqimaappoq, sulisut taama amerlatigisut suliunnaarsinnissai qamuuna attorneqaatigeqaara. Naluneqanngitsutut Naalakkersuisut aalajangajerput Kommuneqarfik Sermersooq kommuneqarfinnut allanut 54 millioninik akiliinerussasoq, taanna soorunami 2015-imut annertuumik sunniuteqartussaavoq. Allaat soraarsitsinermik kinguneqartussaalluni, Kommuneqarfik Sermersuumi borgmesteri Asii Chemnitz Narup oqarpoq.
- Aningaasanik aqutsilluarnerulernissamut tunngatillugu annertuunik suliaqarpugut. Uani soraarsitsisariaqarnermi 54 millioninik akiliisariaqarsimanerput patsisaavoq. Massakkut 2015-imut missingersuutit suliarineqalereerput, takusinnaavarpullu 57 millioninik amigartuussalluta. Imaappoq; 54 millioninik akileeqqittussaasimanngitsuugaluarutta 3 millionit koruniinnarnik amigartooruteqarsimassagaluarpugut. Tamaattumik Naalakkersuisut 54 millioninik akileeqqusinerat patsisaarpiarpoq, Asii Chemnitz Narup oqarpoq.
Aamma atuaruk Kommuneqarfik Sermersuumi taasisoqarnerani aniinnartut
Kommuneqarfik Sermersuup ukiormanna 45 millionit koruuninik amigartooruteqarnissani naatsorsuutigaa, 2015-imilu aamma annikinnerusumik amigartooruteqarnissaa ilimagineqarluni.
Tamatuma saniatigut Kommuneqarfik Sermersooq 2015-imut naligiissaarinermik aaqqissuusseqqinnermut nutaamut atatillugu, akiliutigisartakkami qaavatigut 54 millionit koruuninik tunniussisussaavoq.
Aamma atuaruk Sermersooq kukkunersiuisunit isornartorsiorneqarpoq
Aamma atuaruk Asii: Kikkut tamarmik oqaaseqarsinnaatitaallutik oqallipput