Asii: Kikkut tamarmik oqaaseqarsinnaatitaallutik oqallipput
Kommuneqarfik Sermersuup pisariaqartitai KANUKOKA-mit isumagineqanngimmata, Kommuneqarfik Sermersuup tassanngaanniit ilaasortaajunnaarnissaq qinerpaa, borgmester Asii Chemnitz Narup, Inuit Ataqatigiit taama oqarpoq.
Allattoq Jonas Løvschall-Wedel, Apollo Jeremiassen
- Politikkikkut sulinermi pissutsit tassa taamaapput, borgmester Asii Chemnitz Narup taama oqarpoq, Kommuneqarfik Sermersuup KANUKOKA-mit ilaasortaajunnaarnissaa pillugu kommunalbestyrelsep ippassaq ataatsimiinnerannit Siumukkut Atassutikkullu ilaasortaajunnaarnissamut isumaqataanatik ataatsimiinneq qimammassuk oqarlutik, borgmesterimut tatiginnikkunnaarnermik tunngaveqarlutik ataatsimiinnermiit aniinnarlutik.
Tamanna pillugu Siumup kommunalbestyrelsemi gruppeformandiat, Ane Egede Mathæussen ima oqarpoq.
- Allatut ajornartumik ataatsimiinneq qimapparput, tassami borgmesterimut tatiginnikkunnaaratta. Aamma isumaqaratta illuatungiliuttut kikkulluunniit pisunut sunulluunniit tusarniarneqartussaagaluarmata. Tamannaluunniit pinngimmat tassa ataatsimiittarfik qimapparput.
Kommuneqarfik Sermersuumi kommunalbestyrelsemut ilaasortaq, Ane Egede Mathæussen, Siumut taama nassuiaavoq.
Taassuma taama tunngavilersuinera, borgmester Asii Chemnitz Narup paasisinnaannginnerarpaa.
- Oqaatigisariaqarpoq una qulequtaq pingaaruteqarlunilu asuliinnaanngitsorujussuummatsivisoorujussuarmik oqallippugut kissaammertarlutalu pilluta. Kommunalbestyrelsemilu ilaasortat oqaaseqarusukkaagata oqaaseqartinneqartarput taamaattumik ataatsimiinneq sivisuupilussuarmik ingrlanneqarpoq.
Asii Chemnitz Narup aperaarput ilisarisinnaaneraa, Siumukkut Atassutikkullu oqaaseqartitaasinnaannginnamik ataatsimiinnermiit aniinnarnerminnik tunngavilersuinerat. Tamatumunnga Asii Chemnitz Narup ima akivoq.
- Ane Egede Mathæussenip taama oqarnera ilisarinngilara, tamannalu uppernaserusukkaanni TV-kkut immiussat isiginnaarneqarsinnaapput, Kommuneqarfik Sermersuumi borgmester, Asii Chemnitz Narup taama oqarpoq.