Charlotte Ludvigsen ineqarneq pillugu suliaq pissutigalugu borgmesteritut tunuanngilaq.Assi: Christian Sølbeck

Charlotte Ludvigsenip borgmesteriuinnarnissaa Naleqqap taperserallaraa

Kommuneqarfik Sermersuup, Charlotte Ludvigsen ippassaq unnukkut ataatsimiingaatsiartoqarnerata kingorna suli borgmestereraa.

Nuummi ippassaq unnukkut ulussaarsuartut sakkortutigisumik anoraasuarnerani kommunalbestyrelsit kommunimi ataatsimiipput.

Ataatsimiittarfimmilu aamma qatsungasoqanngilaq, Siumummi Demokraatillu ataatsimiinnerup aallartinnginneraniilli borgmesterimik tatiginnikkunnaarnertik erseqqissaatigereerpaat. Naleqqalli Charlotte Ludvigsen (IA) suli tapersersorpaat, taannalu ullumikkut suli borgmesterip allaffianiippoq.

Kommuneqarfik Sermersuumi suleqatigiit ima inissisimapput

Inuit Ataqatigiit, Demokraatit Nalerarlu kommunimi suleqatigipput.

Inuit Ataqatigiit qulingiluanik qinigaatitaqarpoq.

Demokraatit marluk.

Naleraq marluk.

Kommunimi suleqatigiit katillutik 13-iupput. 

Siumut arfinilinnik qinigaatitaqartoq kisimi illuatungiliuttuniippoq. 

Kommunalbestyrelsimi ilaasortat katillugit 19-iupput.

Demokraatilli borgmesterimik tatiginnikkunnaarlutik ippassaq nalunaarutigaat. Taamaammat Naleraq borgmesterimut suliami kisimi tapersersuilerpoq.

Ullumikkullu - ulussaarsuartulli nipaappoq. Nipaangaatsiartoqarporlu, Charlotte Ludvigsen sulinermini akornusersorneqarusunnginnami – apersorneqarusunnani, kommunip attaveqaqatigiinnermut immikkoortortaqarfianut oqarpoq.

AAMMA ATUARUK Siumut: Charlotte Ludvigsen tunuassaaq

Naleqqamiilli Ken Madsenip ippassaq unnukkut pisut oqaaseqarfiginissai nukissaqarfigai:

- Illuatungaasiuinnartumik aalajangersinnaanngilagut tatiginnikkunnaarluta imaluunniit oqarluta aap tatigeqqissaarpatsigit, kisianni paasissutissat tamarmik pigutsigit eqqortumik inerniliiumaarpugut. Suli aalajanginngilagut oqareernittuut qanoq inississanerluta. Suli suleqatigiinnerput ingerlavoq.

Suliaq ataasinngormat pisoqarfiulersoq

Demokraatit ineqarneq pillugu suliaq pissutigalugu borgmesterimik tatiginnikkunnaarlutik ataasinngormat nalunaaruteqarneratigut pisoqangaatsialerpoq.

Siumut kommunimi illuatungiliuttuusut isumaqataassut  - IA-llu kommunimi suleqatigisaqarnerani amerlanerussuteqarneq Kommuneqarfik Sermersuumi aarlerinartumiilerpoq.

Ineqarnermut tunngasoq Iserimmut 20 millionit koruuninik taarsigassarsinissaanut tunngassuteqarpoq. Aningaasat illunik 2025-mi pisinissamut atugassaapput. Atortitsinissaq Charlotte Ludvigsenip siorna atsiorpaa – ataatsimilli ajornartorsiuteqarpoq: Tassa atortitsinissaq Aningaasaqarnermut ataatsimiititaliamit akuerineqaqqaarsimanngilaq.

Politiinut unnerluutigineqarlutillu soraarsinneqartut

Charlotte Ludvigsenip oqarnera naapertorlugu kommunip pisortaanerisimasaata, Lars Møller-Sørensenip taarsigassarsinissamut allagaammik atsioqqusimavaani.

Suliaq taanna kommunimi pisortaanerusimasup, Lars Møller-Sørensenip aamma sanarfinermut avatangiisinullu pisortaanerusimasup, Hans Henrik Winther Johannsenip soraarsinneqarlutillu politiinut unnerluutigineqarnerannik kinguneqarpoq.

Borgmesterip oqarnera naapertorlugu kommunip pisortaanerisimasaanit borgmesteri suliani arlalinni kukkusumik paasissutissiiffigineqartarsimavoq.

Ataasinngornermi immikkut ittumik ataatsimiittoqarnerani ullormut oqaluuserineqartussami aamma allassimavoq. Immikkoortoq oqitsumik allassimavoq ”pissusissaanngitsumik iliorneq pillugu killiffik” – matumanilu kommunimi pisortaaneq, Ole Jakobsen ima allappoq, ”politikkikkut akuersinissat suliani arlalinni amigaataanerat pillugu pissusissaanngitsumik iliortoqarsimanera allattoqarfiup piffissami kingullermi paasivaa”.

AAMMA ATUARUK Demokraatit vil af med borgmesteren - ellers forlader partiet koalitionen

Inissianik attartornermut isumaqatigiissutit politikkikkut ilaatigut akuerineqarsimanngillat.

Aamma suliffeqarfimmut, PJ Managementimut isumaqatigiissusiortoqarsimavoq. Suliffeqarfik kommunip sanarfinermut immikkoortortaqarfiani avatangiisitigut piginnaasaanik pitsanngorsaasussaavoq, kisianni ”PJ Management isumaqatigiissummi nassuiaatigineqartut tunniussimanngikkai”, oqaluuserisassani allassimavoq.

Attartornermut isumaqatigiissutit pillugit suliaq ineqarnermut suliat ilagaat. Taanna naatsumik oqaatigalugu Nuummi inissianik attartortakkanik 416-inik 2015-imiilli pissarsisoqarneranut tunngassuteqarpoq.

Kommunip inissiaatilinnut namminersortunut isumaqatigiissuteqarnerata kingunerisaanik inissianik 416-inik attartortoqarpoq.

Kommunilli inissiaatileqatigiiffini aqqutigalugu inissianik namminersortunut attartornermini aningaasartuutai attartortitsinermut akinut naapertuutinngillat. Tamannalu kommunip aningaasaqarneranut ukiumut millionerpassuarnik naleqarpoq.

Ineqarnermut suliaq pisoqarfioqattaartoq

Namminersorlutik Oqartussat Kommuninut Nakkutilliisoqarfiata Kommuneqarfik Sermersuup inissianut tunngasumi periusia sapaatit akunnerata siuliani unitsippaa.

Kommunit piginnaatitaanerannut maleruagassanik unioqqutitsinerusoqartoq Nakkutilliisut erseqqissaatigaat.

Ken Madsenip paasissutissat tamarmik suli pissarsiarineqarsimanngissorai.

AAMMA ATUARUK Borgmester om politianmeldte kommunedirektører: Min tillid blev brudt

- Misigivugut kommunimut paasissutissat tunniunneqartut amigaralugit nakkutilliisoqarfimminngaanniit. Borgmesteri ippassaq ataatsimiinnitsinni piumasaqarfigivarput kommunalbestyrelse tamarmiulluta nakkutilliisoqarfimmut taakku misissuinerit tamaasa paasissutissat pissarsiarissagai. Taamaaseriarlunilu pissarsiarigunigit kommunalbestyrelse qaaqqussavaa, immikkut ittumik ataatsimiissaagut. Pappilissat tamaasa pigutsigit eqqortumik inerniliisoqarumaarpoq. Taamatut inissisimavugut. Suleqatigiikkatta, suna tamaat suleqatigiit iluani qulaajarparput siullermik, Ken Madsen oqarpoq.

AAMMA ATUARUK Tidligere kommunedirektører afviser borgmesters påstand

Ineqarneq pillugu suliaq Kommuneqarfik Sermersuumi kommunalbestyrelsimi kisimi pisoqarfiunngilaq.

Suliaq taanna aamma pissutigalugu kommunimi borgmesteriusimasoq, Asii Chemnitz Narup (IA) aningaasaqarnermut naalakkersuisutut ippassaq tunuarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat