Siumut: Charlotte Ludvigsen tunuassaaq
Nunatsinni politikki ullumikkut sammineqangaatsiaqqippoq.
Kommuneqarfik Sermersuumi kommunalbestyrelsit ullumi nalunaaqutaq tallimanut ataatsimiittussaapput. Borgmesterillu Charlotte Ludvigsenip (IA) tunuarnissaa Demokraatit Siumullu piumasaqaatigaat.
Tunuaqqusinerat borgmesterimut ineqarnermut suliaq pissutigalugu tatiginnikkunnaarnerannik pissuteqarpoq.
AAMMA ATUARUK Demokraatit borgmesteri tunuartikkusuppaat - taamaanngippat namminneq tunuassapput
Naleqqat IA Kommuneqarfik Sermersuumi kommunalbestyrelsiniiginnaqatigerusunneraa maanna apeqqutaalerpoq. Kommunimi Inuit Ataqatigiit, Naleraq Demokraatillu suleqatigiipput. Demokraatit borgmesteri tatigiunnaarlugu ippassaq nalunaarutigereerpaat.
Inuit Ataqatigiit, Demokraatit Nalerarlu kommunimi suleqatigipput.
Inuit Ataqatigiit qulingiluanik qinigaatitaqarpoq.
Demokraatit marluk.
Naleraq marluk.
Kommunimi suleqatigiit katillutik 13-iupput.
Siumut arfinilinnik qinigaatitaqartoq kisimi illuatungiliuttuniippoq.
Kommunalbestyrelsimi ilaasortat katillugit 19-iupput.
Demokraatilli borgmesterimik tatiginnikkunnaarlutik ippassaq nalunaarutigaat. Demokraatit illuatungiliuttunngussagunik illuatungiliuttut kommunalbestyrelsimi katillugit arfineq-pingasunik qinigaatitaqassapput, kommunimilu suleqatigiittut aqqaniliulissallutik.
Naleqqap IA-mut tapersersuinini tunuartissaguniuk qinikkat qulingiluaannanngussapput. Inuit Ataqatigiillu taamaalillutik amerlanerussuteqarunnaassallutik.
Naleraq aamma tatiginnikkunnaassaguni kommunimi suleqatigiit amerlanerussuteqarunnaassapput – taamaalillunilu Charlotte Ludvigsen aamma borgmesterimut amerlanerussuteqartunit toqqarneqarunnaassalluni.
Tamanna pissutigalugu tunuarsinnaavoq.
Siumut: Borgmesterissamik piukkunnartumik nassaaritsi
Naleraq borgmesterimut tapersersuinerluni oqaaseqarumanngilaq.
Siumut kommunimi kisimiilluni illuatungiliuttuuvoq, taamaakkaluartorli ersarissumik oqariartuuteqarpoq:
- Kommunalbestyrelsimi amerlanerussuteqartut borgmesterissamik piukkunnartumik nassaarnissaannik kaammattorpai, kommunalbestyrelsimi Siumut sinnerlugu, Inga Dóra G. Markussen oqarpoq.
Ineqarnermut tunngasoq Iserimmut 20 millionit koruuninik taarsigassarsinissaanut tunngassuteqarpoq. Aningaasat illunik 2025-mi pisinissamut atugassaapput. Taarsigassarsititsinisamilli neriorsuut Charlotte Ludvigsenimit atsiorneqartinnagu kommunalbestyrelsip akuerisimanngilaa.
Charlotte Ludvigsenip oqarnera naapertorlugu kommunip pisortaanerisimasaata, Lars Møller-Sørensenip taarsigassarsinissamut allagaammik atsioqqusimavaani.
AAMMA ATUARUK Borgmesteri kommunip pisortai politiinut unnerluutigisaasut pillugit: Tatiginninnera atornerluppaat
Suliaq taanna kommunimi pisortaanerusimasup, Lars Møller-Sørensenip aamma sanarfinermut avatangiisinullu pisortaanerusimasup, Hans Henrik Winther Johannsenip soraarsinneqarlutillu politiinut unnerluutigineqarnerannik kinguneqarpoq.
Borgmesterip oqarnera naapertorlugu kommunip pisortaanerisimasaanit borgmesteri suliani arlalinni kukkusumik paasissutissiiffigineqartarsimavoq.
Ippassaq immikkut ittumik ataatsimiittoqarnerani ullormut oqaluuserineqartussami aamma allassimavoq. Immikkoortoq oqitsumik allassimavoq ”pissusissaanngitsumik iliorneq pillugu killiffik” – matumanilu kommunimi pisortaaneq, Ole Jakobsen ima allappoq, ”politikkikkut akuersinissat suliani arlalinni amigaataanerat pillugu pissusissaanngitsumik iliortoqarsimanera allattoqarfiup piffissami kingullermi paasivaa”.
Inissianik attartornermut isumaqatigiissutit politikkikkut ilaatigut akuerineqarsimanngillat.
Aamma suliffeqarfimmut, PJ Managementimut isumaqatigiissusiortoqarsimavoq. Suliffeqarfik kommunip sanarfinermut immikkoortortaqarfiani avatangiisitigut piginnaasaanik pitsanngorsaasussaavoq, kisianni ”PJ Management isumaqatigiissummi nassuiaatigineqartut tunniussimanngikkai”, oqaluuserisassani allassimavoq.
Suliaq naalakkersuisup tunuarneranik kinguneqartoq
Attartornermut isumaqatigiissutit pillugit suliaq ineqarnermut suliat ilagaat.
Taanna naatsumik oqaatigalugu Nuummi inissianik attartortakkanik 416-inik 2015-imiilli pissarsisoqarneranut tunngassuteqarpoq.
Kommunip inissiaatilinnut namminersortunut isumaqatigiissuteqarnerata kingunerisaanik inissianik 416-inik attartortoqarpoq.
Kommunilli inissiaatileqatigiiffini aqqutigalugu inissianik namminersortunut attartornermini aningaasartuutai attartortitsinermut akinut naapertuutinngillat. Tamannalu kommunip aningaasaqarneranut ukiumut millionerpassuarnik naleqarpoq.
AAMMA ATUARUK Kommunimi pisortaanerusimasup borgmesterip oqarnera eqqunnginnerarpaa
Namminersorlutik Oqartussat Kommuninut Nakkutilliisoqarfiata Kommuneqarfik Sermersuup inissianut tunngasumi periusia sapaatit akunnerata siuliani unitsippaa.
Kommunit piginnaatitaanerannut maleruagassanik unioqqutitsinerusoqartoq Nakkutilliisut erseqqissaatigaat.
Ineqarneq pillugu suliaq Kommuneqarfik Sermersuumi kommunalbestyrelsimi oqallisaangaatsiarpoq.
Tamanna aamma pissutigalugu kommunimi borgmesteriusimasoq, Asii Chemnitz Narup (IA) aningaasaqarnermut naalakkersuisutut ullumi tunuarpoq.
