Canadami Saammaateqatigiinnissaq pillugu Isumalioqatigiissitap sulinera naammassilersoq
Suleqatigiissitaq Canadami nunap inuiisa qanorpiaq innarligaasimanerinik qanorlu saammaateqatigiittoqarsinnaaneranik misissuinissamik suliakkerneqarsimavoq.
Isumalioqatigiissitaq tusarniaalluni Canadami angalasimavoq, naggueqatigiillu Inuit, Metisit Indianerillu kostskolini Canadamiut naalakkersuisuisa kristumiut ilagiivi arlallit peqatigalugit ingerlataanni qanoq pineqartarsimanerminnik nassuiaatinneqartarsimallutik.
Nassuiaatigineqartorpassuarnilu amiilaarnartorpassuit saqqummerarput.
AAMMA ATUARUK Isumalioqatigiissitaliaq Canadami ingerlaqqippoq
Meeqqat ilaqutaasut akuersiteqqaarnagit aallarunneqartarsimapput aammalu meeqqap sumiinnera oqaatigineqartarsimanani. Meeqqallu namminneq oqaatsiminnik oqalukkaangata unatarneqartarsimaneri allallu ininut mattuteqqallugit kinguaassiutitigut atornerlunneqartarsimaneri toqusoqartarsimaneralu aamma oqaluttuarineqarpoq.
Kostskolit Canadami sumiiffinni arlalinni 1888-imit 1995-imut atuupput. Meeqqat katillugit 150.000-it taakkununnga aallartinneqarsimapput, taakkunanngalu ikinnerpaamik 6000-it toqusimapput timaallu isertortumik ilineqarsimallutik. Amerlanerunissaalli ilisimagineqarpoq.
Kostskolit siunertarisimavaat meeqqat oqaasiinik kulturiannillu arsaartornissaat kristumiunngortinneqarnissaallu.
Saammaateqatigiinnissamut ingerlasoqarnera takutinniarlugu, Canadami sumiiffinni arlalinni sapaatit-akunneranni uani akerliussutsimik takutitsisoqarlunilu ingerlaaqatigiittoqassaaq.
