Canadami orpippassuit ikuallannerata qilak taarsisippaa
Seqineq nuinngitsuunngilaq, Canadamiliuna orpippassuit ikuallannerannit putsup nunatsinni qilak qorsorpalunngortillugu sungaartorpaluttunngortikkaat.
DMI taama KNR-imut paasissutissiivoq.
Ukioq manna siullermeersumik timmisartortartunut nalunaarummik nassitsinertik silasiorfiup aamma paasissutissiissutigaa. Nunamiit qummut 18.000 fodip tungaanut tassa 5,5 kilometerit tungaanut ersallussinnaanera nalunaarummi oqaatigineqarpoq.
Pujoq paaliorpoq tamannalu naamaneqarsinnaavoq.
Anoraa saqippat pujoq nunatsinniit aatsaat qaangiukkumaartoq DMI paasissutissiivoq, tamannalu aatsaat pingsunngorpat pissasoq silasiorfiup ilimasaarutigaa.
Pisup aallaavia misissuleruttoritsik nunatsinni politiit Facebookimi quppernerminni allapput, ernumanartoqannginnerali erseqqissaatigalugu.
- Maannakkuugallartoq putsup Nunatsinneersimanissaanut takussutissaqanngilaq. Akerlianilli amerikami avannarlermi nunap ikuallannerata pujua anorimit Nunatsinnut anngussimarpasippoq.
Nunatsinni politiit taama allapput.
Sumiiffimmi ikuallattoqassappat politiit qatserisartulluunniit soorunami attavigineqarnissaat politiinit kaammattuutigineqarpoq.