Canadami Inuit kissaatiginngisaminnik kinguaassiorsinnaajunnaarsitaasimappat?
Naggueqatigiit Inuit First Nationsillu arnartaat kissaatiginngisaminnik, ilaatigullu pinngitsaalisaassummik kinguaassiorsinnaajunnaarsitaasimanerannut tusatsiakkat Canadami qangali siammarterneqartarsimapput.
Kisitsisit sukumiinerusut pigineqanngillat, oqaluttualli ima tutsuiginarsimatigipput Canadami naalakkersuisut 2018-imi suleqatigiissitaliorsimallutik, tamassuma misissuiffigineqarnissaa siunertaalluni.
Arnat pineqartut kissaatiginngisaminnik, ilaatigullu pinngitsaalisaassummik kinguaassiorsinnaajunnaarsitaasimanerat naggueqatigiit Inuit First Nationsillu nunasiaateqarniarnerup aqqani ikilisarniarneqarsimanerattut isigineqarpoq. Arnanik persuttaanertut, arnallu pisinnaatitaaffiiagaanerisut tamanna isigineqarpoq.
Naggueqatigiilli Inuit Nunavummi Nunatsiavummilu arnartaat suleqatigiissitaliami peqataatinneqanngillat.
AAMMA ATUARUK Canadap inatsisartuisa Inuit pisinnaatitaaffii suliariniaraat
Arnat naggueqatigiit Inunneersut, ilaqutariinneersullu taama pineqarsimasut nassaariniarlugit
Quebecimi UQAT Universityp maanna suliniutigilerpaa. Nunap inoqqaavisa suliniaqatigiiffii allat peqatigalugit suliniut piviusunngortinneqassaaq.
Arnat taama pisinnaatitaaffiiagaasimanerat pillugu ilumoortup saqqummiunneqarnissaa pingaaruteqartoq, professorip Suzy Basilep, suliniummik aqutsisup, KNR-imut oqaatigaa.
Quebecimi naggueqatigiit Inuit Creellu arnartaasa kissaatiginngisaminnik kinguaassiorsinnaajunnaarsitaasimasut maannamit aggustip tungaanut nassuiaateqarsinnaassapput.
Arnat taama pisinnaatitaaffiiagaasimasut pillugit ilumoortup saqqummiunneqarnissaanut maanna piffissanngortoq Suzy Basilep oqaatigaa, arnallu maanna tusarniaaffigineqalissallutik.