Canadap inatsisartuisa Inuit pisinnaatitaaffii suliariniaraat
Canadap generalguvernøriata Julie Payettep, Canadap ministeriunera Justin Trudeau sinnerlugu ammaanermi oqalugiaat atuarpaa.
Ammaanermi oqalugiaat kunngikkormiut oqalugiaataannik aamma taaneqartarpoq, generalguvernørimi tuluit dronningiata Elisabethip Canadami sinniisoraa.
Canadami naalakkersuisut politikkikkut ukiup tulliuttup ingerlanerani anguniagaat oqalugiaammi qitiupput.
Canadamilu naggueqatigiit Inuit oqalugiaammi sammisat tunngavigalugit assigiinngitsutigut isumallualersinnaapput.
Naalagaaffiit Peqatigiit nunap inoqqaavisa pisinnaatitaaffiisa pillugit nalunaarutaata qaammatit tulliuttut ingerlaneranni atuutilersinneqarnissaa oqalugiaammi neriorsuutigineqarpoq. Nalunaarut taanna Naalagaaffiit Peqatigiit 2007-imili akuersissutigaat, atuutilersinneqarnissaalu Canadami nunap inoqqaavisa taamanikkulli utaqqisimavaat.
Nunap Inoqqaavisa Arnartaat Periarfeerussat Toqutaasimasullu pillugit Misissuinermut Isumalioqatigiissitap innersuussutaasa, kiisalu Ilumoortussaq Saammaasseqatigiinnissarlu pillugit Isumalioqatigiissitap 2015-imi innersuussutaasa atuutilersinneqarnissaat, oqalugiaammi aamma neriorsuutigineqarpoq.
Naggueqatigiit Inunnut inissianik pitsaanerusunik amerlanerusunillu sanaartortoqarnisssaa neriorsuutigineqarpoq, soorlu aamma naggueqatigiit Inuit peqqinnissakkut sullinneqarnerat pitsanngorsarniarneqartoq.
Canadami nunap inoqqaavisa innuttaasullu sinnerisa akornanni saammaateqatigiittoqarnissaata pingaaruteqarnerpaanera, ministeriunerup Justin Trudeaup CBC-TV-mut ullup ingerlanerani oqaaseqarnermini oqaatigaa.
