Canadami naalakkersuisunngortut ICC-p isumalluarfigai
Okaliup Trudeaumut maluginiaqquaa, naggueqatigiit inuit tarnimikkut napparsimasut annertunerusumik ikiorneqartariaqarmata.
Naggueqatigiit inuit tarnimikkut nappaateqarlutik ilungersuuteqartut aamma ulluinnarni inuunermi ajornartorsiutigineqartut qaangerniarlugit iliuuseqarnissamut pisariaqartitsisoqarpoq.
Assersuutigalugu inissaqarniarnermut tunngassuteqartut, ilinniartitaaneq, ikiaroornartunik atornerluineq aamma inuussutissat naammattut pigineqarnissaat eqqaaneqarput.
Ajornartorsiutip nappaatitulli katsorsarneqarnissaa kisimi pineqanngilaq, Okalik Eegeesiak KNR-imut taama oqarpoq.
Okalik Eegeesiak Trudeaumik ataatsimeeqateqarnermini eqqaavaa, ilinniarluarsimasunik amerlanerusunik pisariaqartitsisoqartoq, taakkua naggueqatigiit inuit inuttut ajornartorsiuteqartorujussuarnik tarnimikkullu ilungersornartumik ajornartorsiuteqartunik sullissisinnaasunik.
Ajornartorsiutit amerlavallaartut suliassaapput, Okalik Eegeesiak ICC-ip siulittaasua oqarpoq.
- Canadap ministeriuneranik ataatsimeeqateqarnera ajunngitsutut taasinnaavara Okalilk oqarpoq.
Trudeaup naalakkersuisunut siulittaasuunera Canadami naggueqatigiinnut inunnut ajunngitsuuvoq, Inuit Issittormiut Siunnersuisoqatigiit siulittaasuat Okalik Eegeesiak KNR-imut taama oqarpoq.