Bruxellesimi aallaasersortoqarmat inuit sisamat ikilerneqartut

Bruxellesimi pingasunngornermi unnukkut aallaasersortup tigusarineqarsimaneranik suli nalunaaruteqartoqanngilaq.
Peqqarniisaarniartoqarsimaneranik takussutissaqanngitsoq, Bruxellesimi politiit erseqqissaatigaat. Sunali tunuliaqutaralugu aallaasersortoqarnersoq suli ilisimatitsissutigineqanngilaq. Assi © : Olivier Matthys/EPA/Ritzau Scanpix
Allattoq Ritzau
decembarip 07-at 2023 09:55
Nutserisoq Mads Lynge

Belgiap illoqarfiisa pingaarnersaanni Bruxellesimi pingasunngornermi unnukkut aallaasersortoqarmat inuit sisamat ikilerneqarput.

Taakkunannga ataaseq peruluttoq nalunaarutigineqarpoq.

Bruxellesimi politiit taama ilisimatitsisut nutaarsiassaqartitsiviup AFP-p allaaseraa.

Politiit aallaasersorfiup nalaanut apuummata aallaasersortoq qimaasimavoq, peqqarniisaarniartoqarsimaneranilli takussutissaqanngitsoq politiit erseqqissaatigaat. Sunali tunuliaqutaralugu aallaasersortoqarnersoq suli ilisimatitsissutigineqanngilaq.

Sverige sinnerlugu EU-mi inatsisartunut ilaasortat ilaat Tomas Tobé inoqatinut attaveqaqatigiittarfikkut X-ikkut allaaserisaa naapertorlugu aallaasersornermi eqqorneqartut ilaat EU-p allattoqarfiani sulisuuvoq.

- Suleqatitta ilaat Bruxellesimi aallaasersornermi ikilerneqarpoq. Annilaarnaqaaq. Eqqorneqartoq passunneqaleruttorpoq, perulunngilarli, taanna allappoq.

Belgiami politiit Bruxellesimi pisoq misissuiffigileruttorpaat.