Braskip timmisartuussinissamini russit isumalluutigigai
Tamatumuuna russit aningaasaliisartut suleqatiginiarai, nittartagaq standby.dk taama allaaserisaqarpoq.
KNR-ip Gert Brask piffissami sivisuumi oqaaseqartinniartaraluarpaa, taannali oqaaseqarusussimanngilaq.
AAMMA ATUARUK Greenland Expressimit aningaasatitik suli tigoqqinngilaat
Gert Braskilli nittartakkamut newstodate.aeromut oqaatigaa russit timmisartorsuinik Sukhoi Superjet 100-nik marlunnik attartornissaq pillugu Ruslandimi suleqatigisani maannakkorpiaq isumaqatigiinniarfigalugu.
- Greenland Express Holdingip namminerisaminik ingerlatsinissamut akuersissummik, AOC-mik, tunineqarnissani maanna sulissutigaa, Gert Barsk oqarpoq, ilanngullugulu aamma oqaatigaa timmisartut 2017-18-imi pingasunik ilaneqarnissaat pilersaarutaasoq.
- Attartornissamik isumaqatigiissutiginiarneqartoq russinit aningaasaliisartunit tapersersorneqarpoq. Timmisartullu ilaqqinneqassappata Greenland Express Kalaallit Nunaata Danmarkillu akornanni timmisartuussiinnarani aamma aqqutinik allanik annertusaassaaq, Gert Brask taama oqarpoq.
Sukhoi Superjet 100 tassaavoq timmisartoq nutaaliaq jetmotorilik 108-inik ilaasoqarsinnaasoq, timmisartunut jetmotorilinnut allanut, soorlu assersuutigalugu Brasiliamiut timmisartuliaannut Embaerimut aamma Canadamiut timmisartuliaannut Bombardierimut unammillertitut sananeqarsimasoq.