Borgmesteriusimasut katillugit 3 millionit koruunit sinnerlugit suli akissarsiaqartut
Naqqiut: Allaaserisami siuliani allassimavoq borgmesteriusimasut sisamat qinigaaqqinngitsut. Tamanna kukkuvoq. Borgmesteriusimasut pingasut qinigaaqqinngillat. Kommuneqarfik Sermersuumi borgmesteriusimasoq Charlotte Ludvigsen (IA) 2022-mi qinigaajunnaarnersiaqarpoq. KNR-ip kukkuneq ajuusaarutigaa.
Nunatsinni kommunini tallimanit pingasut apriilimi qinersisoqarnerata kingorna politikkikkut allaanerusumik ingerlalerput. Borgmesterimmi pingasut borgmesteritut atuukkunnaarput. Taamaakkaluartorli suli akissarsiaqarallassapput.
Borgmesterimmi pingasut borgmesteriugunnaarnerminni qaammatit tamaasa 81.000 koruuningajannik ukiumi ataatsimi qinigaajunnaarnersiuteqassapput. Tamatuma saniatigut borgmesteriusimasut pingajuat katillugit 421.000 koruuninik qinigaajunnaarnersiuteqassaaq. Taakku pingasut taamaalillutik ataatsimut 3,3 millionit koruuninik akissarsitinneqassallutik.
Tamanna borgmesterinut, naalakkersuisunut Inatsisartunilu ilaasortanut qinigaaqqinngitsunut piffissami aalajangersimasumi akissarsiaqartitsinissamut aaqqissuussineruvoq.
Malittarisassat naapertorlugu borgmesteritut atuunnerup ukiup aallartinnerisa tamaasa qaammatip aappaata affaanik qinigaajunnaarnersiuteqarnissamik pisinnaatitaaffeqarput – taamaattorli qaammatinik aqqaneq-marlunnik sivisunerpaaffissaqarluni.
Qeqqata Kommuniani maanna borgmesteriusoq qinigaaffiup pingajussaanik borgmesterioqqikkami qinigaajunnaarnersiuteqassanngilaq.
Akissaatitigut ilungersuaneq
Borgmesteriusimasut saniatigut Inatsisartuni ilaasortaasimasut naalakkersuisullu aamma katillugit 5,6 millionit koruuninik qinigaajunnaarnersiuteqarput. Tamanna allakkat KNR-ip takunniffigisinnaatitaaffigisaata takutippaat.
Politikkikkut oqaaseqartartoq, Jenseeraq Poulsen aalajangiisinnaagaluaruni aaqqissuussineq tamanna politikkikkut oqaluuserineqartariaqaraluarpoq. Taassuma tamanna qaammammi matumani siusinnerusukkut oqaatigaa.
- Inuiaqatigiit atugaat ullumikkut assigiinngitsunik nikingasorujussuupput aamma ukiuni kingullerni nunatsinni inuuniarneq oqinneruleriartunngilaq. Akissaatitigut taanna kinguussaaqqasutut misigisimaneq pisiassallu ulluinnarni akitsoriartuinnartut taakkua eqqarsaatigigaanni nunatsinni eqqartuineq pissusissamisoorpoq, Jenseeraq Piulsen Siumumi allattaasimasoq oqarpoq.
