Borgmesteriusimasoq Kiista Isaksen utoqqaat pillugit oqaaseqartartunngortoq

Kommuni Kujallermi borgmesteriusimasoq Kiista P. Isaksen utoqqaat oqaaseqartartuattut nutaatut atorfinippoq.

Isumaginninnermut naalakkersuisoqarfik taama tusagassiorfinnut ilisimatitsivoq.

Kiista P. Isaksen inunnik isumaginnermut siunnersortitut ilinniagaqarpoq, aamma politikkimut aqutsinermullu tunngasunik misilittagartuujulluni.

- Naalakkersuisut tatiginninnerannut qujanaq. Pingaarteqaara utoqqaat ersarissumik nipeqassasut. Nuna tamakkerlugu oqallinnermi, kisianni aamma najukkami pingaartumillu najukkami politikkikkut tunngasuni. oqarpoq.

Taarseraaffiunikuusoq

Utoqqaat pillugit Oqaaseqartartup utoqqaat atugarisaallu pillugit inuiaqatigiinni ilisimasat annertusassavai. Utoqqaat pillugit Oqaaseqartartup utoqqaat pillugit ilisimasat siammartissavai, tamanut ammasumik oqallinnermi soqutigisaat illersorlugit aamma oqallinnermi utoqqaat peqataanissaannut pitsaanerusunik periarfississallugit inuiaqatigiinnilu ineriartorneq sunniuneqarfigalugu.

Atorfik Inga Egede, juulip tallimaanili tunuarmat inuttaqarsimanngilaq. Inga Egede ukiuni marlungajanni Utoqqaat pillugit Oqaaseqartartuuvoq – kisianni oqaaseqartartutut atorfik ukiunut pingasunut atuuttuusarpoq. Inga Egedep siuliatut atorfimmiittoq Helene Heilmann aamma piffissaq tamaat atorfimmiinngilaq. Ukioq ataasingajualluinnaq Oqaaseqartartutut sulereerluni atorfik qimappaa.

Apriili 2021-mi qinersisoqareersoq borgmesteriujunnaarpoq

Maanna Kiista P. Isaksen atorfimmik taarseraaffiusumi misiliisussanngorpoq.

- Nuannaarutigaara Utoqqaat pillugit Oqaaseqartartumik atorfik inuttassarseqqikkatsigu. Pingaaruteqarluinnarpoq utoqqaat illersuisinnaasumik oqaaseqartartoqarnerat, utoqqaammi namminneq oqallinnermi nipitunerpaaneq ajormata. Qularutiginngilara Kiista P. Isakseni utoqqaat minnerunngitsumik allat qanimut suleqatissat peqatigilluinnassagai,utoqqarnut atugassarititaasut pitsanngorsaaviginerani sulineq ingerlatiinnassagaa. Inuiaqatigiit akornanni atugassarititanut tamanut tunngatillugu annertuumik piginnaaneqarpoq ilisimasaqarlunilu, soorlu utoqqarnut, inuusuttunut, oqartussanut kattuffinnullu tunngasuni, Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoq, Jess Svane oqaaseqarpoq.

Kiista P. Isaksen kommune Kujallermi Siumut sinnerlugu borgmesteriunikuuvoq.

Kommunimut qinersisoqarmat apriilimi 2021-mi Stine Egedemut Inuit Ataqatigiinneersuumut ajorsarpoq.