Borgmesterit Kommuneqarfik Sermersuup aninera pakatsissutigaat

- Uagutsinnut annerusumik isumaqarnissaa takorluunngilara, kommune Kujallermi borgmesteri Jørgen Wæver Johansen oqarpoq.  

- Angusagut tamarluinnaasa pinerit tamaasa angunngikkaluaraangatsigilluunniit, narralluta qimaaneq ajorpugut. Peqatissarsiortarpugut aamma anguniakkagut anguniartarpagut peqatigisinnaasagut ilagalugit.

Ilanngulluni Qaasuitsup Kommuneani borgmesteri Ole Dorph isumarpoq, Kommuneqarfik Sermersuup aninera, ilaasortaanerannut sunniuteqarnavianngittoq.

Kisianni Qeqqata Kommuniani ugguarput.

- Anisussanngornertik aalajangiummassuk uggornarpoq. Kommunip kattuffia nakuunerunissaagalua innarlerneqartutut isigivara.

Tassalu kommunit isumaat tamakkiisumik saqqummiunneqartarunnaassasoq, borgmester Hermann Berthelsenip aarleqqutigaa.

Kommuneqarfik Sermersuumi politikerit misigisimapput, kommuninit allanit piffissami sivisuallaartumi tapersersorneqarsimanatik, taamaattumillu peqatigiiffimmiit aniinnarnissaat pisariaqalersimalluni.

Aamma atuaruk Asii: Kikkut tamarmik oqaaseqarsinnaatitaallutik oqallipput

- Oqartariaqarpunga KANUKOKA-p siunertaminut naapertuuttumik suliunnaarnikuummat, borgmester Asii Chemnitz Narup oqarpoq.

- Assersuutigalugu siorna Naalakkersuisut 20 millioninik unnuaaneriinnarmi ilanngaaffigimmatigut, ukioq mannalu 54 millioninik ilanngaaffiginiarluta aalajangermata KANUKOKA  nipaarluulluni oqaaseqarsimanngilaq.

Kommuneqarfik Sermersupp ilaasortajunaarneratigut KANUKOKA-p isertitami 40 procentii annaassavai. Ilaasortalli sisamaajunnaarlutik  sineruttut pingasuinnanngoraluarlutik, kattuffeqarnertik siunissaqartoq isumaqarput.

- Qanoq iliortoqartariaqarnissaa siunissamut eqqarsaatersuutigisariaqassavarput. KANUKOKA-mi ataatsimeeqqilerutta, qularnanngilaq aamma taanna eqqartorneqarumaartoq, borgmester Hermann Berthelsen KNR-imut taama oqarpoq