Borgmesterip igalaavinik aserorterisut paasineqanngillat
Qaanaami politiit sapaatip akunnerata naanerani borgmesterip allaffiata igalaavisa aserorteriffigineqarneranut atatillugu inuit 15-it missaanniittut apersorsimavaat – iluatsitsivallaarnatilli.
Kikkuugaluarnersunit ujaqqat assattut atsigisut borgmesterip allaffiata igalaavatigut ilummut milluutigineqartarsimapput.
Politiinit inuit borgmesterip allaffiata qanittuaniittumi imerniartarfimmiissimasut klubbimiissimasullu apersorneqaraluarput, kisianni arlaannaalluunniit takusaqaranilu tusaasaqarsimanngilaq.
Qaanaami politeeqarfiup pisortaa, Aage Jensen aamma isumaqarpoq igalaanik aserorterineq eqqasuutissaanngitsoq, tassami illoqarfimmi aatsaat siullermeerluni igalaanik aserorterisoqalinngimmat.
- Siornatigut ujarak igalaakkut ilummut miloriunneqarsinnaasoq takoreernikuuarput, politeeqarfiup pisortaa oqarpoq.
Igalaanut ujaqqanik milloorneq pivoq illoqarfimmi borgmesterimut akerliuniarluni atsiornernik katersisoqaleruttortoq. Isornartorsiuinermi pineqarpoq borgmester Johanne Nielsenip kommunip aningaasatigut ajornartorsiornera naammaginartumik iliuuseqarfigisimanngimmagu.
