Borgmesteri: Patajaatsuunngimmata Naleraq suleqatigiunnaarparput

Kommuneqarfik Sermersuumi borgmesteri Avaaraq Olsen Inuit Ataqatigiinneersoq, Naleraq kommunimi aqutseqaataasutut ippassaq suleqatigiunnaagartik nalunaaarutigineqareersoq ima oqarpoq.

- Gruppi nalilersuisimavoq Demokraatit suleqatigilernerini patajaannerusumik suleqatigiinneq pilissasoq.

Partiit taakku marluk, nunatta illoqarfiisa pingaarnersaanni ukiuni kingullerni aappaata affaani suleqatigiipput, ippassap tungaanut.

Borgmesterip oqarnera malillugu Demokraatit Naleraq aqutseqataasussatut isumaqatigiissummut ilaatikkusussimanngilaat, taamaattumillu IA aalajangersimavoq. Naleraq suleqatigiunnaarpaat. 

Suna Naleqqakkut suleqatigalugit naammaginarsimannginnersoq aperigatsinni borgmesteri akerusunngilaq:

- Naleqqakkut nalunngilaat, Avaaraq Olsen KNR-imut oqarpoq.

Sooruna Naleraq suleqatigiunnaarissi?

- Akerusuppallaanngilara, oqarpoq.

Sooq?

- Tassa soorlu nassuiaassinikkut patajaannerusumik politikkikkut Demokraatit suleqatiginerisigut kommunimi angusaqarnerujumalluta.

Naleqqakkulli susoqaraluttuarneranik sumininnguamilluunniit pasitsaassaqarsimanngillat. Taama Naleraq-gruppip siulittaasua Ken Madsen KNR-imut ippassaq oqarpoq. Det sagde gruppeformand Ken Madsen i går til KNR.

- Borgmesterimit nal. 13 missaani sianerfigineqarpunga. Siusinnerusukkut susoqalerneranik ilisimasaqanngilanga, oqarpoq. Oqaluukkanni sooq taama iliornerlutik oqaatiginngilaa. Ilisimatinneqaannarpunga, taakku (IA-kkut aaqq.) Demokraatit suleqatigileraat, uagut suleqatigiunnaarluta.

- Oqaaseqarpallaarsinnaanngilanga. Ukiut aappaata qeqqata matuma siornagut partiit pingasuulluta suleqatigiippugut, kisianni Demokraatit, IA-p tatigiunnaarmagit anisitaapput. Tatigeqqilersimassavaat.

Pingajussaa suleqatigiittoqalersoq

Inuit Ataqatigiit suleqatigimmik apriilimi 2022-mi kingullermik taarsiipput. Taamani Demokraatit kommunimi aqutsisutut suleqatiginerannit peersinneqarmata – IA Nalerarlu suleqatigiilerput.

Partiip taamani borgmesteriusoq novembarimi 2021-mi tunuaqqugaluarpaat.

Charlotte Ludvigsenili maajimi borgmesteritut ukioq taanna tunuarpoq. Maanna Avaaraq Olsen borgmesteriuvoq, taassumalu Demokraatit suleqatigilernissaat qilanaaraa.

Borgmesteri nutaaq sulilernikooriarmat Demokraatit, kommunimi aqutsisutut suleqatigiinnissamik IA-mit aperineqariaramik, nangaassuteqanngillat.

- Taamanikkut suleqatigiikkunnaarpugut, borgmesteri (Charlotte Ludvigsen, aaqq.) pillugu. Kingorna suleqatigiileqqinnissamut ammajuarsimavugut, Demokraatit gruppianni siulittaasoq Justus Hansen KNR-imut oqarpoq.

Læs også Demokraatit er tilbage på magten i kommunalbestyrelse - og Naleraq er ude

Justus Hansen, sooq Naleraq isumaqatigiissusiorfigiinnanngilisiuk?

- Naleqqap aalajangiisarnerinut arlalinnut akerliusaratta, kisianni una pisoq tassa borgmesterip nammineq aalajangigaraa, Justus Hansen oqarpoq.

Sooq?

- Aalajangigassaqartillugu Naleraq peqataasinnaasorinanngimmat, taamaammat aninerat uagutsinnut ajunngiinnarpoq. IA-llu tamanna aalajangigaraa, kisianni Naleqqamut tunngatillugu uatsinnit naammagittaalliutit soorunami anngunnikuuagut, oqarpoq.

Suleqatigiinneq nutaaq, anguniakkat suli taakkuusut

Demokraatit oqarnerat naapertorlugu suleqatigiinnissamut isumaqatigiissutitoqqami anguniagassatut allassimasut amerlasuut, IA Nalerarlu apriili 2022-mi suleqatigiilermata suli allassimapput.

Taamaattumik suleqatigiinnissamut isumaqatigiissut nangeqqinnaritsik oqaatigaat.

- Taamanikkulli anguniagassatut allannikuusagut (IA Demokraatillu, aaqq.) suli allaqqapput, soorlu aamma IA-p Naleqqallu isumaqatigiissusiaanni suli atasimasut. Taakku nangissavagut, Justus Hansen oqarpoq.

Avaaraq OIsen, erseqqissumik paaserusukkaluarparput Naleraq suut suleqatigiissinnaanngissutiginerisi, Demokraatillu suleqatigiissutigisinnaasasi?

- Isumaqatigiissutitsinniippoq. Patajaannerusumik politikkikkut piffissamullu ungasinnerusumut aamma takorluuisunik Demokraatit suliniuteqarmata.

Demokraatit oqarput, anguniagassatutt siunniussat Naleqqamut isumaqatigiissutigisassinneereersut Demokraatinut isumaqatigiissusiassinnut aamma ilanngussimagisi. Suna nutaartaraa?

- Patajaassuseq.

Naleraq patajaassimanngilaq?

- Aap.

Qanoq?

- Akerusutakka akereerpakka.

Kommunalbestyrelsemi inissat 19-iupput. IA-meersut arfineq-pingasuupput, Demokraatimeersut marluullutik.

Naleqqakkut marluupput.