Borgmesteri: Kommunip Tunumi nunaqarfinni suliai pitsaanngillat

Kommunip Tunumi nunaqarfinni suliai naammaginanngillat.

Kommuneqarfik Sermersuup borgmesteriata Inuit Ataqatigiinneersup, Avaaraq Olsenip, tamanna nassuerutigaa.

- Nunaqarfinni kommunimit sullissineq unamminartortaqarsinnaasoq ilisimareerparput, kisianni kommunitut sortaatigut pitsaanerussanerluta angalaninni itinerusumik paasilluarpara, Avaaraq Olsen oqarpoq.

Ingammik sanaartornermut suliat ajornartorsiorfiupput. Borgmesteri naapertorlugu, kommuni sanaartugassanik suliariumannittussarsiuussigaangat, suliarijamannittutut nalunaartoqarneq ajorajuppoq.

- Suliarinnittussarsioraluartarnermut taavalu neqerooruteqartannginnermut ajornartorsiut annertoorujussuuvoq. Nunaqarfinni suliassat suliarinnittussaqartannginneq pissutigalugu aallartinngitsoortartut paasivarput. Taamaalillunilu nunaqarfinni ineriartortitsineq kigaattuaqqamik ingerlavoq.

Tamannalu ajornartorsiutini kisimiinngilaq. Puttasut immamut aasaq manna singinneqarneq ajorput, kommunimi illuni sulliviit amigaateqarput angallatinullu iluarsaasarfiit pitsanngorsarneqarneq ajorlutik.

Borgmesterillu ajornartorsiutit qanoq aaqqiivigineqassanersut naluaa. Kommunilli sullissivii angallatinullu iluarsaasarfiit pillugit ima neriorsuivoq.

- Suliassanik assigiinngitsunik aallartitassaqarpugut. Ilaatigut nunaqarfinni aqutsisut peqatigalugit aaqqiissutissanik ujartuissaagut.

Sanaartornermillu suliassat qanoq aaqqiivigineqarnissaat politikerinit, nunaqarfiit aqutsisuinit atorfilittaniillu oqaloqatigiissutigineqassapput.

- Suliarinnittussarsiornermi iluatsitsinngitsooraangatta, kommunitut nammineq aaqqiissuteqarsinnaasarnerluta eqqartugassanut aamma ilaavoq, Avaaraq Olsen oqarpoq.