Borgmesteri ataatsimiinnermi tusaaniartoq. Bjørk Lange Olsenili ataatsimik iluaagisaqarpoq

Kommuneqarfik Sermersuup Nuuk Outdoor suleqateqatigiunnaaraluaraa immikkut ittumik suli inissiisoqartassasoq borgmesterip Ilaqutariinnermut peqqinnissutsimullu ataatsimiititaliamut sisamanngornermi ataatsimeereernermi paasissutissiissutigigaa, Bjørk Lange Olsen (D) oqarpoq.

Allattoq Anders Rytoft, Hansigne Broberg

januaarip 12-at 2024 10:24

- Ataasimiinneq ataatsimut isigalugu ajunngitsumik naammassisaqarfiusumillu ingerlasoq isumaqarpunga.

Inatsisartut ilaqutariinnermut peqqissutsimullu ataatsimiititaliaanni siulittaasup tullia, Bjørk Lange Olsen, Kommuneqarfik Sermersuup borgmesterianik, Avaaraq S. Olsenimik, ataatsimeeqateqarneq pillugu taama oqarpoq.

Ataatsimiinneq takornarialerisumut Nuuk Oudoorimut meeqqat angerlarsimaffiup avataanut inissinneqarsimasunik paarisaqartumut immikkullu ittumik inissiisarnermut tunngavoq.

- Oqaloqatigiilluarpugut. Borgmesteri meeqqanut avataanut inissinneqartartunut ernumassutigineqartunut tusaaniarpoq, Bjørk Lange Olsen oqarpoq.

Aamma atuarukBorgmesteri maanna siunersiorneqartussanngortoq

Kommuneqarfik Sermersooq meeqqat angerlarsimaffiup avataanut pinasuartumik inissinneqartut, KNR-imit piffissami kingullermi allaaserineqaqattaartut pillugit aaqqiissuteqarniartoq, Bjørk Lange Olsen misigisimavoq.

NUUK OUTDOOR AAMMA PILERTORTUMIK INISSIINERIT PILLUGIT ALLAASERISAT IMMINNUT ATASUT

Allaaserisaq manna tassaavoq allaaserisat imminnut atasut arlallit ilaat, taakkunanilu suliffeqarfik Nuuk Outdoor qanimut sammivarput.

Takornarianut neqerooruteqartartoq maaji 2023-miilli Kommuneqarfik Sermersuup meerartai pilertortumik allamut inissinneqartut nunaqarfimmut Kapisilinnut umiatsiamik ingerlattarpai.

Tassani meeqqat 17-t illuaqqani mikisuni nillertuni ilinniarsimasunik paarsisoqarnatik najugaqarput, tamannalu ilaatigut kinguneqarpoq tillinniarnernik, aserorterinernik qimaariarnernillu arlalinnik.

Ilutigitillugu Nuuk Outdoor pillugu suliap takutippaa oqartussaaffeqarfinni ajornartorsiuteqartoq, tassa pappiaqqanik amigaateqarnerup kinguneraa paaqqinniffimmik naleqquttumik nassaarnissap tungaanut, meeqqat qaammatini arlalinni utaqqisariaqarnerannik.

Piffissami utaqqiisaasumi kommunip nammineq akisussaaffigaa utaqqiisaasumik inissiivissanik nassaarnissaq nakkutilliinissarlu. Kisianni inatsisitigut piumasaqarfiunngitsumik.

Bjørk Lange Olsenilli oqarnera naapertorlugu, kommunip meeqqanik immikkut ittumik suli inissiisarnissaa ilimagineqartariaqartoq borgmesteri oqarpoq.

- Taannartaa toqqissisimanarpallaanngilaq, Bjørk Lange Olsen oqarpoq.

Oqaloqatigiinnerunissaq

Tamannalu pitsaanngitsoq, taanna isumaqarpoq. Borgmesterimillu ataatsimeeqateqarneq eqqarsalersitsivoq.

- Kommunimeersut allamik iliuusissaqarneq ajoramik immikkut inissiisariaqartarlutik oqaatigisaqattaarpaat. Taamaammat tamanna unitsinniarlugu qanoq iliorsinnaanerluta ataatsimoorluta paasiniartariaqarparput.

- Ataatsimiitsitaliamit arlaannik iliuuseqarnissatsinnut piareersimavugut. Massami uanga nammineerlunga piareersivunga, Bjørk Lange Olsen oqarpoq.

Aamma atuarukMeeqqat angerlarsimaffiup avataanut inissinneqartut nunaqarfimmiut toqqissisimassutiginngikkaat

Taassuma oqarnera naapertorlugu, ataatsimiititaliap borgmesterillu oqaloqatigiinnerusarnissaq isumaqatigiissutigaat. Meeqqat angerlarsimaffiup avataanut inissinneqartartut pillugit ajornartorsiutit ataatsimoorlutik aaqqiiviginiarsariniarpaat.

- Taamanna ajunngitsorujussuuvoq. Qilanaarpunga. Suliaqarfimmi pitsanngorsaanissarput iluatsissagutsigu ataatsimoorfissarsiortariaqassagunarpugut.

Borgmesterip meeqqat Nuuk Outdoorimiittut maanna arfineq marluusut sisamanngornermi ataatsimiinnermi paasissutissiissutigaa. Taakkunannga marluk inissiffissarsineqarsimapput, pingasullu utaqqisuniillutik. Sinneruttut marluk 18-ileereersimapput. Kommuni 18-ileereersimasunut naleqquttumik aaqqiissutissarsiorpoq.

- Ajunnginneruleriartorpoq, Bjørk Lange Olsen oqarpoq.

Borgmesteri Avaaraq Olsen KNR-imit apersorneqarnissaminut sisamanngormat ataatsimiinnerup kingorna periarfissaqanngitsoq, Kommuneqarfik Sermersuup attaveqaqatigiinnermut immikkoortortaqarfiata paasissutissiissutigaa.

Nutaarsiassami kukkunermik nassaarsimaguit uunga allaffigineqarsinnaavugut.