Borgmesteri tassaarsuaqarsinnaaneranik nalileereernermi: Pikkoriffiginerusariaqarpasipparput
Uummannap qanittuani Karrat Kangerluanni maanna tassaarsuaqartuugaluarpat, Qaarsormiut Niaqornarmiullu qanoq iliornissartik ilisimanavianngikkaluarpaat.
Qaarsunni Niaqornanilu siulersuisut siulittaasuat, Edvard Nielsen, tassaarsuaqarsinnaaneranik nalileeqqittoqarsimanera tallimanngormat nalunaarutigineqareersorlu, KNR-imut marlunngormat taama oqarpoq.
- Nuugaatsiami 28,4 m,
- Illorsuarni 8,7 m,
- Niaqornani 3,8 m,
- Qaarsuni 4,8 m taavalu
- Uummannami 4 m.
Tusarfiit: Naalakkersuisut
Edvard Nielsenip tassaarsuaqarsinnaaneranik nalileeqqittoqarsimasoq tusagassiuutitigut tusaramiuk, Namminersorlutik Oqartussat Avannaata Kommuniataluunniit tassaarsuaqariataaraluarpat inuit qanoq iliornissaannik kalerriisimannginnerat naammaginngilluinnarpaa.
AAMMA ATUARUK Tassaarsuaqarsinnaanernut naliliineq nutaaq: Karrat Kangerluanni tassaarsuaqaratarsinnaasoq
Avannaata Kommuniatalu borgmesteriata Palle Jeremiassenip (S), kommuni innuttaasunut kalerriilertupallassimasinnaagaluartoq Ilulissani allaffimminit nassuerutigaa:
- Susoqarpiarnersoq innuttaasunut paasititsiniaalluarnerusimasariaqarpasippugut, taanna KNR-imut oqarpoq.
Isertuunneqarsimasoq
Taanna tassaarsuaqarsinnaaneranik naliliineq pillugu nalunaarusiortoqarsimasoq sapaatit akunnerata siuliani sisamanngornermi, tassa aqaguani nalunaarutigineqartussaasoq, ilisimatinneqarpoq.
- Tamanna taamaalioqquneqarnerput naapertorlugu ullormik ataatsimik isertuupparput. Inuilli tamatuma kingorna paasissutissinneqarnissartik amigaatigisimagaat paasisinnaavara. Maanna paasititsiniaavugut, tamannalu nuannaarutigaara. Pikkoriffiginerusariaqarpasipparpulli, Palle Jeremiassen oqarpoq.
AAMMA ATUARUK Nunaqarfinni aqutsisoq: Tassaarsuaqassagaluarpat piareersimanngilagut
- Isumaqarpungali sammisamut immikkut ilisimasallit nalunaarusiap imarisaanik innuttaasunut nalunaaruteqassasut. Nalunaarusiami ilngersunartut pissutigalugit nalunaaruteqarnissaq tunuarsimaarfigineqarpoq, taanna KNR-imut oqarpoq.
Niaqornani Qaarsunnilu innuttaasut nutaarsiassaq tusagassiuutitigut tallimanngormat tusarpaat. Ilaat tupangaatsiarsimapput. Tamanna paasisinnaaviuk?
- Paasisinnaavara. Soorunami tupapput. Immikkulli ilisimasaqartut nalunaaruteqartuusariaqarput. Uagummi nalunaaruteqarutta tamannalu kukkunerusimappat tamanna uatsinnut utertussaavoq.
Ilisimatusarnermut avatangiisinullu naalakkersuisoq, Jess Svane (S) Ilulissiarluni ippassaq aallarpoq. Taassuma Avannaata Kommuniani kommunalbestyrelsit nunaqarfinnilu Niaqornani Qaarsunnilu aqutsisut ataatsimeeqatigai. Ataatsimiinnermi ujarassiuumik tassaarsuaqaratarnissaanut aarlerinartumik ilisimatitsisumik aamma peqataasoqarpoq.
Taakku maanna Qaarsunnut Niaqornanullu ingerlaqqissapput, tassanilu ilimatitsinermik ataasinngorpat marlunngorpallu ataatsimiititsisoqassalluni.
Tassaarsuaqarnissaa pinngitsoortinneqarsinnaanngitsoq
Naalakkersuisunit tassaarsuaqarnissaanik naliliinermi nutaami Karrat Kangerluanni qaqqat ilaanni nuna sisooriaannaq tamarmi ataatsikkorsuaq sisuussagaluarpat nunatta avannaani Niaqornani, Qaarsuni Uummannamilu meterit tallimat angullugit portutigilersinnaasumik tassaarsuaqariaannaavoq.
Qaqqap ataatsikkut sisoornissaa ’ilimanavinngilaq’, Naalakkersuisulli oqarnerat naapertorlugu taamattoqannginnissaa oqaatigivinneqarsinnaanngilaq.
AAMMA ATUARUK Niaqornarmiu Benigne tassaarsuaqarsinnaaneranik naliliineq pillugu: Sinnarluttarpunga
Mallit portunerpaat Nuugaatsiamut eqquisinnaasut 28,4 meterimik portussuseqarsinnaapput. Illorsuarni 8,7 meterinik portussuseqarsinnaapput - sumiiffiilli taakku marluk 2017-imili najugaqarfigineqarunnaarput.
Pigaartunik aaqqiissuteqarneq Niaqornani Qaarsunnilu pilersinneqarpoq.
Uummannami pigaartumik aaqqiissuteqarnissaq piffissami matumani pisariaqanngitsoq, Upalungaarsimanermut ataatsimiititaliaq naliliivoq.
- Karrat Kangerluanni 2017-imi juunip ulluisa 17-ianni qaqqap sisoorneratigut Nuugaatsiaq Illorsuillu tassaarsuarmik eqqugaapput. Nuugaatsiami ilaqutariit pingasut angullu utoqqasaanerusoq ajunaarput illullu qassiiusut tassaarsuarneranit imaanut nusunneqarput.
- Taamani misissuinermi innamit suli annerusumik sisoortoqaqqeratarsinnaammat - tamanna nunaqaffinni innuttaasunut ulorianarsinnaasoq takutinneqarpoq. Tamanna pissutigalugu nunaqarfinni innuttaasut illoqarfinnut annerusut soorlu Uummannamut Ilulissanullu, nussortinneqarput.
- Aarlerinartunik naliliinermi nutaami qaqqamit sisoorsinnaasoq 2017-imi tassaarsuaqartitsisumit quleriaatip missaanik annertunerusutut nalilerneqarpoq.
