Nunaqarfinni aqutsisoq: Tassaarsuaqassagaluarpat piareersimanngilagut
Nalunaaqutaq 16:00 naqqiut: Naalakkersuisoqarfimmi pisortaq Mette Skarregaard KNR-imut ilisimatitsivoq, tassaarsuaqarsinnaaneranik ilimasaaruteqarpat, tamanna kommunip nunaqarfimmi aqutsisunut nalunaarutigissallugu akisussaaffigigaa.
Taamaammat taanna Avannaata Kommunianut innersuussivoq, tassalu nalunaaruteqarsimannginnermik Mette Skarregaard oqaaseqartuunngilaq.
Allaaserisamik siullermik taama allassimagaluartoq kukkuneruvoq. KNR ajuusaarpoq.
Karrani qaqqani sisoortoqarluni tassaarsuaqaleraluarpat Qaarsut, Niaqornat Uummannarlu malerujussuarnit 5 meterinit eqqorneqarsinnaapput. Taamaalitinnagulu nunarfimmiut nigortersinnaaniassammata, kalerrisaarisussanik upalungaarsimasoqalerpoq.
Naliliinerli nutaaq nunaqarfimmiunut suli agguaanneqanngilaq. Taamaanneralu Qaarsuni uissuummissutaavoq.
- Tassuuna tusagassiorfitsigut tusarnera, allamillu tusagaqarnanga. Soorunami tupappunga, uanga taamatut nalilerpara. Uanga tupappunga.
Qaarsuni Niaqornanilu aqutsisut siulittaasuat, Edvard Nielsen taama oqarpoq.
Ajornerpaamik pisoqassagaluaruni tassaarsuaq uku missaannik portussuseqassasoq:
- Nuugaatsiami 28,4 meterit,
- Illorsuarni 8,7 meterit,
- Niaqornani 3,8 meterit,
- Qaarsuni 4,8 meterit, aamma
- Uummannami 4 meterit.
Tigusiffik: Naalakkersuisut
Kommissionimiit, kommunimut, nunaqarfimmiunut
Tassaarsuaqarataannaaneranik naliliineq nutaaq Avannaata Kommunianut erngertumik nalunaarutigineqartoq, Upalunngaarsimanermut ataatsimiititaliami siulittaasoq, aamma avatangiisinut naalakkersuisoqarfimmi pisortaasoq, Mette Skarresgaard Pedersen, oqarpoq.
AAMMA ATUARUK Niaqornarmiu Benigne tassaarsuaqarsinnaaneranik naliliineq pillugu: Sinnarluttarpunga
- Nunaqarfinnut aqutsisunut allakkanit tikittoqanngilaq ulloq manna tikillugu, Edvard Nielsen oqarpoq.
Nunaqarfimmiulli aatsaat sisamanngorpat paasissutissinneqassasut, Avannaata Kommuniani borgmesteri Palle Jerimiassen KNR-imit oqarpoq.
Illut amerlanerit ulorianartorsiorfimmiipput
Nunaqarfinni aqutsisut siulittaasuata, taama kingusitsigisumik ilisimatinneqarnissartik toqqissisimanartinngilaa.
- Annguttoqartariaqaraluarpoq, qanoruna pilersaarusiortoqartariaqaraluartoq. Taamannallu tassaarsuartoqaleriasaassagaluarpat suunuku illut qimaaffissat?
- Sualuppoq Niaqornani, Niaqornat nunataat pukkuaraagamik, illut tamakkingajallugit tassa aarlerinartorsiorfiusumiipput.
AAMMA ATUARUK Tassaarsuaqarsinnaanernut naliliineq nutaaq: Karrat Kangerluanni tassaarsuaqaratarsinnaasoq
Avatangiisinut naalakkesuisoqarfik Avannaata Kommunea suleqatigalugu tallimanngorpat innuttaasunut paasititsiniaajartorlutik aallassapput.
