Tassaarsuaqarsinnaanernut naliliineq nutaaq: Karrat Kangerluanni tassaarsuaqaratarsinnaasoq
Karrat Kangerluanni qaqqaq ulorianartorsiortitsisoq ataatsikkut nakkaakkaluaruni tamanna 5 meterit tikillugit portussuseqartumik nunatta avannaani Niaqornani, Qaarsunni Uummannamilu tassaarsuaqarsinnaavoq.
Naalakkersuisut aarlerinartunik naliliineq nutaaq tunngavigalugu tusagassiuutinut taama nalunaaruteqarput.
Ajornerpaamik pisoqassagaluaruni tassaarsuaq uku missaannik portussuseqassasoq:
- Nuugaatsiami 28,4 meterit,
- Illorsuarni 8,7 meterit,
- Niaqornani 3,8 meterit,
- Qaarsuni 4,8 meterit, aamma
- Uummannami 4 meterit.
Tigusiffik: Naalakkersuisut
Qaqqap ataatsikkut sisoornissaa ’ilimanavinngilaq’, kisianni maannakkutut isikkoqartillugu taamattoqannginnissaa Naalakkersuisunit oqaatigivinneqarsinnaanngilaq.
Paasissutissat nutaat ulungersunartutut isigisariaqarigut, naalakkersuisoq, Jess Svane erseqqissaavoq.
- Innuttaasut sumiiffimmiittut paasitinnissaat paarinissaallu pisussaaffigaarput. Innuttaasut sumiiffimmiittut illersorniarlugit Naalakkersuisut aamma Avannaata Kommunia pigaartuusarnermik, najukkani upalungaarsimasut immamik nakkutiginnilluarfigisassaanik pilersitsipput.
- Tassaarsuaqalissagaluarpat najukkani upalungaarsimasut nilliasaatinik aallartitsissapput, aammalu innuttaasut erngerlutik imaq ungasillillugu qaffasinnerusumut qimaassapput, naalakkersuisoq allappoq.
Niaqornani Qaarsunnilu pigaartunik aaqqiissuteqarnisssaq
Mallit portunerpaat Nuugaatsiamut eqquisinnaasut 28,4 meterimik portussuseqarsinnaapput. Illorsuarni 8,7 meterinik portussuseqarsinnaapput - sumiiffiilli taakku marluk 2017-imili najugaqarfigineqarunnaarput.
Pigaartunik aaqqiissuteqarneq Niaqornani Qaarsunnilu unnugu atuutilissaaq. Tassa imaappoq inummik imaani susoqannginnersoq nakkutiginnittoqartassaaq. Pisoqassagaluarpallu kalerrisaarut aallartinneqassalluni.
Upalungaarsimanermut Ataatsimiititaliap Uummannami piffissami matumani pigaartoqartarnermik taamaattumik pilersitsinissaq pisariaqanngitsoq naliliivoq. Innuttaasut ernumassuteqartut apeqqutissaqarunik Naalakkersuisut oqarnerat naapertorlugu kommunimut saaffiginnissapput.
Misissuinerup inerneri maanna qularnarallartut naatsorsuinernillu nutaanik suliaqartoqartoq tusagassiuutinut nalunaarummi allassimavoq. Naatsorsuinerit taakku marsimi pissarsiarineqarsinnaalernissaat pilersaarutaavoq.
Taamaakkaluartorli sillimaniarneq tunngavigalugu paasissutissat saqqummiunneqarnissaat aalajangerneqarpoq.
- Innuttaasut tassaarsuaqarnissaanut takussutissanut immikkut ittumik eqqumaffiginninnissamut eqqaaseqqinneqarnissaat pingaaruteqarpoq, tusagassiuutinut nalunaarummi allassimavoq.
Qaqqamit sisoortoqarfiusoq
Karrat Kangerluanni 2017-imi juunip ulluisa 17-ianni qaqqap sisoorneratigut Nuugaatsiaq Illorsuillu tassaarsuarmik eqqugaapput. Nuugaatsiami ilaqutariit pingasut angullu utoqqasaanerusoq ajunaarput illullu qassiiusut tassaarsuarneranit imaanut nusunneqarput.
Taamani misissuinermi innamit suli annerusumik sisoortoqaqqeratarsinnaammat - tamanna nunaqaffinni innuttaasunut ulorianarsinnaasoq takutinneqarpoq. Tamanna pissutigalugu nunaqarfinni innuttaasut illoqarfinnut annerusut soorlu Uummannamut Ilulissanullu, nussortinneqarput.
Aarlerinartunik naliliinermi nutaami qaqqamit sisoorsinnaasoq 2017-imi tassaarsuaqartitsisumit quleriaatip missaanik annertunerusutut nalilerneqarpoq.
Innuttaasut nunaqarfinnut angerlaqqikkusullutik siusinnerusukkut oqaatiginikuuaat. Tamannali ulorianarpallaarpoq, qaqqamiimmi sisoortoqaqqinnissaanut Karrat Kangerluannilu tassaarsuaqarnissaanut aarlerinartoq suli annertuallaartoq, Danmarkimi Kalaallit Nunaannilu ujarassiuutut misissuiffiup GEUS-ip siorna oktobarimi nalilerpaa. Taamammat nooqqittoqartariaqanngitsoq nunatsinni Upalungaarsimanermut ataatsimiititaliap nalilerpaa.
Naliliineq naapertorlugu Karrat Kangerluani qaqugu sumerpiarlugu tulliani annertuumik qaqqamit sisoortoqassanersoq siulittorneqarsinnaanngilaq.
