Niaqornarmiu Benigne tassaarsuaqarsinnaaneranik naliliineq pillugu: Sinnarluttarpunga
Qaarsormiut ilaat aarlerinngitsorujussuuvoq, Niaqornarmiulli ilaat sininneq ajulertarluni.
Tassami Karrat Kangerluanni qaqqat ilaanni nuna sisooriaannaq tamarmi ataatsikkorsuaq sisuussagaluarpat Avannaani Niaqornani, Qaarsuni Uummannamilu meterit tallimat angullugit portutigilersinnaasumik tassaarsuaqariaannaavoq, naliliinermi erserpoq.
- Nuugaatsiami 28,4 m,
- Illorsuarni 8,7 m,
- Niaqornani 3,8 m,
- Qaarsuni 4,8 m taavalu
- Uummannami 4 m.
Tusarfiit: Naalakkersuisut
Nunatsinni qaqutigoortumik ajunaarnersuaqartarpoq, taamaammallu inuit ilarpassuisa Karrat Kangerluanni 2017-imi juunip ulluisa 17-ianni tassaarsuaqartoq nalunaarutigineqarmat sumiinnerlutik sulerinerlutillu eqqaamassajunnarsivaat.
Karrat Kangerluanni tassaarsuaqarneranik kinguneqartumik qaqqap ilarujussuani nunap ataatsikkorsuaq sisoornissaa ilimanarpallaanngikkaluartoq taamaattoqarataannaavoq.
AAMMA ATUARUK Tassaarsuaqarsinnaanernut naliliineq nutaaq: Karrat Kangerluanni tassaarsuaqaratarsinnaasoq
79-inik ukiulik, Benigne Løvstrøm, tassaarsuaqarfiorataannaasup kujasissuaniittumi Niaqornamiuusoq aarlerivoq.
- Nalunngikkaluarpara sisooratarsinnaasoq, kisianni raatiukkut tusarakku assorujussuaq tupappunga. Sumunnarfissaralu nalullugu. Akimut imaluunniit pikunga qulaatungitsinnut. Pitsorluttuuvunga isigiarsuttuullungalu, Benigne Løvstrøm oqarpoq.
Karrat Kangerluanni nunaqarfinnut tallimanngormat upalungaarsimasoqalerpoq. Tassani pigaartoqarpoq, taakkualu imaq nakkutigalugulu malissuaqalissappat kalerrisaarissapput. Tamanna Benigne Løvstrømip tuppallersaatigilaarpaa, taamaattorli:
- Assut tupannarpoq, unnukkullu sinnarlullunga. Itsuanisaartaqattaarlunga inussiorlungalu, Niaqornarmiu oqarpoq.
Johannes Hansen Uummannap Sulluata ilaani aamma nujagaqarpoq. Taanna ernumarpianngilaq.
- Uanga eqqissisimasuuvunga. Ernumasaarutit taamaattut imannarsuaq tassanngaannartumik tiguneq ajorpakka. Taama pisoqassappat soorunami eqqissisimaniartitsisussaavugut, aamma inuit kalluarnaveersaarlugit eqqissilluta pisariaqaratta, allatut ajornartumik. Taava piareersimassaagut, Qaarsormiu Johannes Hansen oqarpoq.
Oqartussat ersarissumik inassuteqarput: Pisarnermit tinipiluussappat ulipiluussappalluunnniit piaarnerpaamik timmukartoqassaaq.