Bjørn Tegner Bay: Hashi inerteqqutaajunnaassappat tamanna nunatsinnut ajornaannerussaaq
Cannabis taamalu hashi inatsisitigut akuerisaassappat?
Tamanna kikkut tamarmik maanna apersuutigaat, tamannali iluamik suli akineqarsinnaanngilaq.
Inatsisartuni partiit tamarmik oqallinnissamut piareersimallutik sapaatip akunnerata siuliani nalunaarutigaat.
AAMMA ATUARUK Illuatungiliuttut ilannguttut: Partiit tamarmik cannabis pillugu oqallinnissamut piareertut
Politimesteri, Bjørn Tegner Bay tassunga tunngatillugu isumaminik annissinissaminut aamma piareerpoq.
- Uanga nammineq isumaqarpunga inuiaqatigiit inatsisinik oqallisiginninnerat peqqinnartuusoq, taamaaliornikkut ajoqutaasut iluaqutaasullu misissorluarneqarsinnaassallutik, taanna KNR-imut oqarpoq.
Nunatsinni ikiaroornartut sakkortunerusut amerlanerulernerannik kinguneqarsinnaasoq
Naalli politimesterip oqallittoqarnissaa tikilluaqqugaluaraa, cannabisip hashillu inatsisitigut akuerineqarnissaa ajortuinnarmut ingerlasinnaangajannissaa nakimanani isumaqarfigaa.
-Hashi inatsisitigut akuerineqaraluarpat, tamanna nunatta ajunaarnersuaripajaassangaaluunniit isumaqapunga.
Taassuma nunatta ikiaroornartunik sakkortuunik suli ajornartorsiuteqarujussuulinnginnissaa iluatsinneqartoq erseqqissaatigaa, maannamuugallartoq.
AAMMA ATUARUK Marius Petersen om cannabis-debat: Det er bedre, hvis det bliver lovligt
Inatsisitigummi akuerisanngortitsinissamut apeqqut illugiinnik sammiveqarpoq.
Aningaasat pinerluttuliortunut tunuliaqutaasunukarnatik naalagaaffiup karsianut nakkaassapput.
Kisianni aamma pinerluttuliornermi tunuliaqutaasut allatigut aningaasanik pissarsiussapput.
- Nunatsinni hashimik ullumikkut tuniniaanermi tunuliaqutaasut iliuutsitik inunnut allanut innarliingaatsiartut soqutiginagit ersarissumik takutereeraat isumaqarpunga, politimesteri, Bjørn Tegner Bay oqarpoq.
Inatsisitigut akuerisanngortitsinerup kingunerisaanik pinerluttuliortut aningaasanik hashimik nioqquteqarnermi pissarsisinnaajunnaarnermi kinguneranik sakkortunerusunik tuniniaanissamik misissuilernissaat taassuma ernumassutigaa.
Suli sumiginnaanerulernissaq aarlerinartoq
Allorfiup 2021-mi ukiumoortumik nalunaarusiaa naapertorlugu innuttaasut atornerluisuunerminnik katsorsarneqartut amerlasuut 18-iliineqanngitsunik meerartaqartuupput. Innuttaasut katsorsarneqartut misissuinermilu peqataasut 42 procentii angerlarsimaffimminni meerartaqarput. Tamannalu meeqqat atugarissaarnissaannut ajornartorsiutaavoq.
Angajoqqaat atornerluisuusut nammineq meeqqaminnut qanoq sumiginnaasinnaanerat, Allorfiup nakorsatut siunnersortaata, Birgit Niclasenip KNR-imit sapaatip akunnerani matumani siusinnerusukkut oqaloqatigineqarami oqaluttuaraa.
- Meeqqat ingammik hashimik atornerluiffiusumi peroriartortut ilaginnakkatut misigigajuttartut oqartoqarsinnaavoq. Taakku salliutinneqanngitsutut misigigajupput. Angajoqqaatimmi ikiarooraangamik attavigiuminaattarput, taanna oqarpoq.
AAMMA ATUARUK Hashimik atornerluisutut katsorsartikkusuttut 65 procentimik amerlanerusut
Politimesterip angajoqqaani hashimik atornerluisuni takusimasaanut tamanna aamma assinguvoq.
- Inuit angerlarsimaffiannukaraangatta ajornartorsiut takusarparput, tassa meeqqat sumiginnarneqarsimasut takusarpagut. Hashimik pujortarnermut ilaguutiinnalersimaneq pissutigalugu inuusuttut ilinniakkaminnik paarsisinnaanngitsut, aamma inuit suliffimminnik paarsisinnaanngitsut takusarpagut, Bjørn Tegner Bay oqarpoq.
Taassuma hashi inerteqqutaajunnaaraluarpalluunniit ulorianannginnerulernavianngitsoq eqqaamaneqarnissaa kaammattuutigaa.
- Hashimik atornerluinermi inunnut nalilimmik kingunipilui inatsisitigut inerteqqutaajunnaarsitsinikkut anigorsinnaanngilagut. Killormuuanillu amerlanerusut hashimik pissarsisinnaalernissaat aarlerinarnerulersissavarput, taanna oqarpoq.
