Marius Petersen cannabis pillugu oqallinnissamut: Ammaanneqarpat pitsaanerussaaq

Hashi cannabisilu pillugit oqallittoqarnissaa Nuummi innuttaasut pingasut KNR-ip illoqarfimmi naapitaasa isumaqatigingaatsiarpaat.
Politikerit cannabis hashilu pillugit oqallittoqarnissaa innersuussutaat Marius Petersenip isumaqatiaa. Assi © : Henriette Simonsen
Allattoq Megan Hansen
januaarip 28-at 2023 11:27

Cannabis hashilu nunatsinni inerteqqutaajunnaassappat?

Atassutip siulittaasua Aqqalu Jeremiassen facebookkikkut quppernermini sapaatip akunnerani uani aperivoq. Oqallinnerlu tassannga aallartilluni.

Aqqalu Jeremiassen nammineerluni politikkikkut isumaqannginnerarpoq. Oqallitsitserusullunili.

Oqallinnerli hashimut kisimi tunngassanngilaq, cannabisilli aamma oqallisigineqarnissaat taassuma naatsorsuutigaa.

KNR-ip innuttaasut qanoq isumaqarneri pillugit Nuummi illoqarfiup qeqqani paasiniaavoq.

Assi © : Henriette Simonsen

Assi: Henriette Simonsen

Marius Petersen

Ikiaroornartoq pillugu innuttaasut oqalliseqataanissaannik politikerit piumasaqarput. Oqallisigisariaqarparput?

- Kajuminnarpoq oqallisiginissaa. Massakkut ullutsinni atuisorpassuupput, taava ammarneqarnissaa pitsaanerussaaq. Soorlu aningaasaq nalinginnaq nunatsinniit aniatikkunnaarlugu. Nunatta iluani akileraaruserneqarunik aamakorsuussagaluarput.

Oqallinnerup qanoq ingerlannissaa takorloorsinnaaviuk?

- Oqallisigigunikku suut ajoqutaasut suullu iluaqutaanersut, uanga paasisinnaanngilara suunukua ajoqutigigai? Sooruna tunngavilersuineq ajortut ajortunik? Taamaallaat oqaatsit atortarpaat ”ulorianarpoq, ulorianarpoq” tunngavissaqaratilli. Taanna oqallisigineqarnissaa assut alutornarpoq.

Oqallisiginissaa nangiarnalaartoruna?

- Ija ukua akerlilersuisartut pikkorissorujussuugamik, tunngavissaalli amigarlutik taavalu naqissuserneqartarluni atuisuusimavoq, soorlu taamatuusak. Oqallisigineqarpat ajunngilaq.

 

Assi © : Henriette Simonsen

Assi: Henriette Simonsen

 

Henrik Tobiassen 57-inik ukiulik.

Ikiaroornartoq pillugu innuttaasut oqalliseqataanissaannik politikerit piumasaqarput. Oqallisigisariaqarparput?

- Aap, oqallisigisariaqarparput ulloq manna tikillugu, siornakkunni inuit pingasut annaareernikuupput. Taava neriuppunga arlaatigulluunniit ammaaffigissagaat.

Ikiaroornartup nunatsinni akuerisaanissaa illit qanoq isumaqarfigaajuk?

- Ajunngilaq, isumaqarpunga torrattoq taamatut iliussagaluarpata. Taamaattoqassappat, immikkut pisiniarfeqartariaqarpoq. Ukiorpassuanngorami taanna oqallisaajuaannaavilluni ikiaroornartoq, ammaassissaagut imaluunniit ammaassissanngilagut. Torrassagaluarpoq oqallisigineqartuuguni.

 

Assi © : Henriette Simonsen

Assi: Henriette Simonsen

 

Margrethe Noahsen 61-inik ukiulik.

Ikiaroornartoq pillugu innuttaasut oqalliseqataanissaannik politikerit piumasaqarput. Oqallisigisariaqarparput?

- Aap isumaqarpunga oqallisigisariaqartoq. Ukiorpassuarni nunatsinni toqqorterlutik anngiortumik eqqussisut, toqutsinerit, eqqissiviilliortitsinerit naammalinnginnamik? Naammappoq. Ikiaroornartoq ammaattariaqartoq isumaqarpunga.

Ikiaroornartup nunatsinni akuerisaanissaa illit qanoq isumaqarfigaajuk?

- Isumaqarpunga akuerineqassasoq, aamma ukua eqqaarusuppakka anngiortumik iioraallutik eqqusseriarlutik toqusoortartut aamma taava tamakkua pinaveersaartinneqassagaluarput. Nalugaluarpagut kikkuusut, kisianni unioqqutitsineq annertungaarmat toqumik naleqartariaqarluni, taamaammat isumaqarpunga ammaattariaqartoq tamakkua pinaveersaartinneqassappata.