Hashimik atornerluisutut katsorsartikkusuttut 65 procentimik amerlanerusut
Cannabis ikiaroornartorlu hashi inerteqqutaajunnaassappat?
Atassutip siulittaasuata, Aqqalu Jerimiassenip apeqqut tamanna Facebookimini sapaatit akunnerata siuliani saqqummiullugu oqallisaarutigaa. Tamannalu tamatuma kingorna oqallisigineqaqaaq.
Tamanna pillugu nammineq isummerani oqallisaarutigiginili, Aqqalu Jerimiassen oqarpoq.
Inatsisartullu tamanna pillugu oqallikkusupput.
AAMMA ATUARUK Marius Petersen om cannabis-debat: Det er bedre, hvis det bliver lovligt
Katsorsaavimmi Allorfimmi pisortaq, Birgit Niclasen, oqalliseqataarusunngilaq. Politikerimmi tamanna oqallisigisassarigaat, taanna isumaqarpoq.
Ikiaroornartumilli hashimik atornerluisutut katsorsartikkusuttut amerliartuinnartut, taanna oqarpoq.
Imigassamik, hashimik aningaasanoornermilluunniit ajornartorsiuteqaruit Allorfimmi katsorsartissinnaavutit.
Katsorsartinneq akeqanngilaq.
Allorfik Aasianni, Ilulissani, Nuummi, Qaqortumi Sisimiunilu katsorsaaveqarpoq.
Amerlasuut aamma imigassamik atornerluisuusut
Angutit 220-t arnallu 312-it ikiaroornartumik atornerluisutut katsorsartikkusullutik Allorfimmut 2019-imi saaffiginnipput.
Katsorsartikkusuttut 2021-mi amerlanerupput. Angutimmi 377-it arnallu 500-t katsorsartikkusullutik saaffiginnipput. Tassa 65 procentimik amerlanerupput.
- Hashimik atornerluisutut katsorsartittut amerliartuinnarput. Hashimik atornerluisut ilarpassui imigassamik aamma atornerluisuupput. Taakkunannga ilaat aamma aningaasanoorajuttuupput. Taamaammat pinngitsuuisinnaajunnaarnerit tamarmik imminnut ataqatigiipput, Bigit Niclasen KNR-imut oqarpoq.
Imigassamik, hashimik aningaasanoorajunnermilluunniit ajornartorsiutillit ataasiinnaanngitsumik atornerluisuukkajuttut, takussutissiami erserpoq. Assersuut: Imigassamik atornerluisuni 622-usuni hashimillu atornerluisuni 234-usuni 185-it imigassamik hashimillu atornerluisuullutik ilisimatitsipput. Tusarfik: Allorfik
- Hashitorneq ataatsimut isigalugu toqqutaasinnaanngilaq. Kisianni ajoqutigineqarsinnaavoq. Suli inuusulluni hashimik atuisunngorneq ilikkariartorsinnaanermik innarliisinnaavoq.
Makkunani eqqumaniarit
Ilungersuasullu tassarpiaapput meeqqat atornerluinermik ajornartorsiuteqarfiusumi peroriartortut.
- Meeqqat ingammik hashimik atornerluiffiusumi peroriartortut ilaginnakkatut misigikkajuttartut oqartoqarsinnaaovq. Taakku salliutinneqanngitsutut misigikkajupput. Angajoqqaatimmi ikiorooraangamik attavigiuminaattarmata.
Hashimik atornerluisutut katsorsartikkusukkaanni qanoq iliortoqarsinnaava?
- Katsorsartinnissaq pisariaqartoq siullermik nassuerutigisariaqarpoq. Amerlasuut naqqinnitsigatik saaffigisanngilaatigut.
AAMMA ATUARUK Arnaq hashimik anngiortumik eqqusseriaraluartoq tigusarineqartoq
- Qitornat atornerluinermik ajornartorsiuteqalersimasorigukku attavigiuminaattarnersoq, atuarfimmi naammassisakittarnersoq pigisassinnillu tammartoqartarnersoq eqqumaniarfigiuk. Hashimik atornerluineq akisuvoq. Hashimillu atornerluisut ilaat ajornartoorluinnaraangamik mobiilitik tunisarpaat, angerlarsimaffimmiluunniit pigisat tammarartarput.
- Angajoqqaat qitornamik pissusaat allanngornersoq eqqumaniarfigisariaqarpaat, Birgit Niclasen oqarpoq.