Biskoppit atorfinitsinneqartarnerat ministerip allanngortikkusuppaa

Nunatsinni taama siunnersuuteqartoqaraluarpat provstit marluk, Siumumilu  ilageeqarnermut oqaaseqartartup tapersersussagaluarlugu oqaatigaat.

Ilagiit lutherikkunni biskoppit tjenestemanditut utoqqalinersiuteqarnissamik tungaannut atorfinitsinneqartarnerat ukiuni kingullerni 100-ni atuuppoq, tamannalu ileqqoq nutarteriffiginiarlugu Danmarkimi ilageeqarnermut ministeri Manu Sareen inatsisissatut allannguutissamik siunnersuuteqarpoq.

Siunnersuutaa naapertorlugu biskoppit atorfeqarnerat ukiut aqqarneq-marlukkaarlugit nutarterneqartalissaaq, suliffeqarfiit allat assigalugit piffinni nutaani malinnaatillugu, tassa tjenestemanditut atorfinitsitaasarneq atorunnaassasoq. 

Nunatsinni biskoppi Sofie Petersen tjenestemanditut atorfeqarpoq. Nunatsinni provstit kissaatigivaat biskoppip Danmarkimisut tjenestemanditut atorfinitsinneqartarnera atorunnaassasoq.

- Ilageeqarnermi ingerlaaserput tunngavigalugu isuma tapersersornartorujussuuvoq. Inuttarsiuinermik pinngikkaluarluta, eqqarsaat taanna assorsuaq tapersersornarpoq, taama oqarpoq avannaani provsti Hans Johan Lennert.

Ilagiittut nutartertuarneqarnissaq pisariaqartoq aamma biskoppeqarnerup iluani avannaata provstia oqaatigaa.

Kujataata provstiata Dorthe T. Petersenip taperserpaa oqarlunilu:

- Isummat nutaat pisariaqartinneqartarput, nutaanik eqqarsartunik takusaqarnissaq. Isumaqataasinnaavunga biskoppi ukiunik aqqarneq-marlukkaarluni atorfeqarnera nutarterneqartassappat,  Dorthe T. Petersen oqarpoq.

Qeqqata provstia Isak Davidsen oqaaseqarumanngilaq, isumaqarami politikerit tamanna suliassarigaat.

Inatsisartuni inatsisissatut allannguutissatut siunnersuutigineqaraluarpat akuerineqarlunilu biskoppip atorfeqarnera ukiut aqqarneq-marlukkaarlugit nutarterneqartalissagaluarpoq, atorfeqarnini biskoppip nutartersinnaassavaa tunuarluniluunniit.

Nunatsinni biskoppi Sofie Petersen ukioq 1995-imi ivertinneqarpoq.

Siumup ilageeqarnermut oqaaseqartartuata Ruth Heilmannip siunnersuut isumaqatiginartippaa oqarlunilu:

- Taamatut eqqartuisoqalernera iluatinnartorujussuuvoq. Soqutiginarpoq, aamma pitsaaqutai tassani qularnanngitsumik erserumaarmata maannamiit atuuttumiit ajunnginnerussasoq, taama oqarpoq Ruth Heilmann.

Suli inatsisissatut allannguutissatut Inatsisartuni siunnersuuteqartoqanngimmat Inuit Ataqatigiit ilageeqarnermut oqaaseqartartuat Jane Petersen isummersorusunngilaq, oqarporlu:

- Siunnersuut soqutiginarpoq. Inatsisinut tunngasut upperisamullu tunngasut uani ataatsimoortikkusunngikkaluarlugit, isumaqarpunga isummersorfigineqarsinnaasoq aamma ilagiit sinniisai nunatsinni qanoq isummernerat tusarusunnarpoq, Jane Petersen oqarpoq.

Biskop Sofie Petersen atorfimminut tunngatillugu oqallinnermut oqaaseqarusunngilaq.