Birna tallimanngornermi ilisaassaaq

Suliaq arnamut tunngasoq aallartippoq illoqarfiit pingaarnersaanni Reykjavikimi arfininngornermi januaarip ulluisa 14-ianni. Kingorna pisoq annilaarnartoq ingerlavoq, suliarmi kalaallit kilisaataataannut Polar Nanormut attuumassuteqalermat taanna Islandimut utertariaqarlerpoq, tikimmallu inuttaasut marluk tigusarineqarput.

Suliaq Islandimi assorsuaq aalassaataavoq, nunamini tassani toqutsisarnerit qaqutigoortupilussuupput. Taamaattumik Polar Nanormi inuttat tigusarineqarmata islandimiut tusagassiuutaannit malinnaavigineqarlutik assilineqarput, islandillu tusagassiuutaasa ilaasa pasineqartut assingi tamanut saqqummiuppaat.

Birna Brjárnsdottir periarfeerunneraniit sapaatip akunnera ataaseq qaangiuttoq toqungasoq sissami nassaarineqarpoq, Islandillu oqaluttuarisaanerani ujarlerneq aatsaat taama annertutigisuunerarneqarpoq, annaassiniartartut 500-it peqataammata.

Polar Nanormi inuttaasup aappaata tigummigallagassanngortitaanera ippassaq naavoq. Inuttap aappaa iperagaavoq, KNR-illu paasisai naapertorlugit taanna ippassaq sisamannornermi unnukkut Nunatsinnut angerlarpoq.

Unnerluussisoq naapertorlugu suliami angut toqutsinermut pasisaajunnaarpoq. Inuttaasulli aappaata parnaarunneqarnera sivitsorneqarpoq sulilu immikkoortitaalluni parnaarussaalluni.

Birna Brjárnsdottir Hallgrimskirkjami nunatta nalunaaqutaa malillugu ullup qeqqanut ilisaassaaq.  Iceland Monito allaaserisaqarpoq arnap angajoqqaavisa inuit qinnuigisimagaat annaassiniartartoqatigiit Landsbjörrg SAR naasunut taarsiullugu aningaasanik nasseqqullugit.