Angut Islandimi iperagaasoq aallarsinnaatitaavoq

Islandimi arnap Birnap toqutaaneranut atatillugu kalaaleq angut pasineqartutut tigummigallarneqarsimasoq maanna tigummigallagaajunnaarsimalerpoq, Nunatsinnullu angerlarsinnaatitaasoq, eqqartuussissuserisup nalunaarutigaa.
Birna
februaarip 02-at 2017 15:22

Birnamut suliamut atatillugu tigummigallarneqartut aappaa iperagaasoq, Islandimi nutaarsiassaqartitsiviit ullumi siusinnerusukkut oqaluttuaraat. Angullu taanna Nunatsinnut angerlarsinnaatitaasoq angutip eqqartuussissuserisuata oqaatigaa.

- Tigummigallarneqarunnaarnini nuannaarutigaa, Örn Elvarsson KNR-imut oqarpoq.

Angutip kisimiitsitaalluni tigummigallarneqarnini pikkunanaarsimagaa, ”ajunngitsorli” eqqartuussissuserisup oqaatigaa.

Iperagaavoq sulili pasineqarpoq

Örn Elvarsson naapertorlugu angut suliamut atatillugu suli pasisaaqqavoq, tamannali nalinginnaanngitsuusoq eqqartuussissuserusup oqaatigaa:

- Tigummigallarunnaarlugu aallarsinnaatippaat, suliarli taama nakkutigineqartigitillugu tigummigallagaajunnaaraluarluni suli pasisatut inissisimanera nalinginnaanngitsuuvoq, Örn Elvarsson oqarpoq.

Angut Birna Brjánsdóttirimut toqutsinermi suli pasisaagaluaruni iperagaasimanavianngikkaluartoq suliamut tunngatillugu unnerluussisussaatitaasoq, Jon H. B. Snorrason Islandimi nutaarsiassaqartitsivimmut Visirimut oqarpoq. Politiilli angut iperagaasoq Birna Brjánsdóttirimut tunngasunik paasissutissanik kalerriutiginngisaqarsorigaat, unnerluussisussaatitaasup aamma oqaatigaa.

AAMMA ATUARUK Birnamut tunngasut

Angut sulisitsisuminit Polar Seafoodimit ikiorneqartoq Örn Elvarssonip paasissutissiissutigaa. Sulili Islandimiinnerarpaa, taamaakkaluartorli Kalaallit Nunaannut ulluni qaninnerni aallarsinnaanissaa naatsorsuutiginerarpaa.

Angut kalaaleq eqqartuussisumut ilisimasaminik sisamanngornermi nassuiaaqqippoq kingornatigullu iperagaavoq.

Eqqartuussissuserisoq: Nutaarsiassaqarfiit assilersuinerat atilersuinerallu iluanngilaq

Suliani taamaattuni eqqartuussisumut ilisimannittutut nassuaateqarnissaq nalinginnaasuusoq, Örn Elvarssonip nassuaatigaa. Suliallu inerneqapallannissaa eqqartuussissuserisup neriuutigaa.

- Neriuutigisinnaasarput tassaavoq suliaq naammassineqarluni inerneqarluarnissaa taamaalilluni angutip pasineqarnera taamaatinneqassaaq, Örn Elvarsson oqarpoq.

AAMMA ATUARUK Birna nunarsuarmi malinnaavigineqarluartoq

Eqqartuussissuserisup ilanngullu oqaatigaa, Islandimi nutaarsiassaqartitsiviit suliamut atatillugu angutip assinganik aqqanillu tamanut saqqummersitsinerat ajoraluartoq:

- Oqaatigiinnarsinnaavara aqqata inuillu angummut tassunga qanoq isumaqarnerannik ajoqutaasinnaasoq, tamannali kingusinnerusukkut misissuiffigissavarput. Tigummigallagaajunnaarnera maanna pingaarnerpaavoq, Örn Elvarsson oqarpoq.