Bingo-mut akitsuut utertippaat
![](/sites/default/files/styles/image_934x467/public/article_images/bingpspil_ny_630.jpg_2.jpg?itok=op2D0i7D)
Isummap allanngoriataarneranut atatillugu Aningaasaqarnermut Naalakkersuisup, Maliina Abelsenip, tunngavilersuutigaa, siunnersuutip tapersersorneqarpallaannginnera. Sermitsiaq.ag-ip nittartagaani tamanna atuarneqarsinnaavoq.
Siunnersuut Inatsisartuni ataasinngormat oqaluuserineqarmat paasinarsivoq, Lotto-p akileraaruserneqarnissaa Inuit Ataqatigiinneersup, Olga P. Berthelsenip, kissaatigigaa, timersoqatigiiffiilli iluanaaruteqarnissaminnut periarfissaat eqqorneqassanngitsut. Siulersuisut sungiusaasullu, namminneq piumassutsiminnik annertuumik suliaqartut, eqqugaanissaat, Jens Immanuelsenip, Siumumeersup, ernummatigaa.
Eqquiniaasitsinermut akileraarut qaffanneqaraluarpat aningaasanoornermik pinngitsuuisinnaanngitsunut tamanna immaqa pitsaasumik kinguneqassagaluarpoq, Sermitsiaq.ag-ip nittartagaani allapput.
Eqquiniaasitsinermut akileraarutip qaffanneqarnissaanut pilersaarutit timersoqatigiiffiit TV-qarfiit- radioqarfiillu ippassaanikkunni ernumanartoqartittorujussuuvaat.
Qaffanneqaraluarpata tamanna Nunatta Karsianut 8 millionit koruuninik ukiumut isertitsissutaasassagaluarpoq.
Maliina Abelsenip ippassaq unnukkut erseqqissaatigaa aningaasaqarnermut aappaagumut inatsissap oqimaaqatigiinnissaa suli anguniarneqassasoq, taamaammallu 5 - 8 millionit koruunit amigaataasut qanoq pissarsiarineqarsinnaanerannut sapaatip-akunnerata tulliani pingajussaaneerneqarnerani arlalinnik siunnersuuteqarniarluni.