Ukioq manna juullip nipitittagaa aajuna
Taamaammat juullip nipitittagaata Nuummi Katuami arfininngormat saqqummiunneqarnera tulluavippoq.
Juullip nipitittagaanik ukiut 43-ssaannik saqqummiussisoqarpoq. Taanna nuannarineqarluartumik Andalamik titartaasup Nunattalu oqaluttuarisaaneranik titartakkanik oqaluttualiamik "Oqaluttuaq"-mik taaguuteqartumik suliarinnittup eqqumiitsuliortup Nuka Godtfredsenip titartagaraa.
Juullip nipitittagaata pappiaranngorlugu elektroniskimillu pissarsiarineqarsinnaasup ukioq manna assiliartaa tassaavoq juullip inua nissiararlu ukiukkut aqisserniartut.
Katuami arfininngormat saqqummiussinermut atatillugu aamma Juullip Nipitittagaata nersornaasiuttagaa tunniunneqarpoq.
Taanna eqqumiitsuliortumut Frederik Kunngi Kristensenimut 1977-imi juullip nipitittagaanik siulliit ilaannik titartaasuunermi saniatigut aamma atuakkanik, erinarsuutinik eqqumiitsulianillu amerlasoorsuarnik suliaqarsimasumut ukioq manna tunniunneqarpoq.
- Kunngi inuunini tamaat eqqumiitsuliorneq kulturerpullu pillugit suliaqarsimavoq, Juullip Nipitittagaata Aningaasaateqarfiata siulersuisuini siulittaasoq William Kriegel arfininngormat tunniussinermi ilaatigut taama oqarpoq.
