Biilikunik isaterititsinissamut ikiuiniartut
Tassungalu aningaasartuutigisassat aqqusinermi angallannermut akitsuutip qaffanneratigut pissarsiarineqassapput.
AAMMA ATUARUK Biilinut akitsuusersuisarneq allanngortinniarneqartoq
Naalakkersuisut biilinik eqqussuinermut, aqqusinermilu angallannermut akitsuutinut nutaamik aaqqissuussinerminnut atatillugu, kommuninut ikiuullutik illoqarfinni biilikuerussaaniarput.
Biilit qimaannakkat kusanarnatillu avatanngiisinut pitsaasuunngillat kommunillu biilinut qimaannakkanut maanna aningaasartuuteqartuusarput. Tamannalu ajornartorsiutaajartuinnartoq siunnersuutip nassuiaataani allaqqavoq.
Qamutinut motoorilinnut akitsuut qaffanneqassaaq
Biilit nummerpladii ilisarnaasersuutitullu normui peerneqartarput, taamaalilluni kommunit biilinik piginnittut nassaarisinnaanagillu peernerinut akiligassissinnaaneq ajorpaat.
Taamaammat Naalakkersuisut biiliutikut kommuninut akeqanngitsumik tunniunneqarsinnaalersinniarpaat. Illutuangaanillu kommunip biilit isaterneqarnerannut aningaasartuutaat Naalakkersuisut utertinniarpaat.
Isaterinerillu aningaasalersorniarlugit biilinut jannuaarip ulluisa aallaqqaataani 2018 sioqqullugu nalunaarsorneqarsimasunut aqqusinermi angallannermut akitsuutip ukiumut 350 koruuninik qaffanneqarnissaa, Naalakkersuisut siunnersuutigaat.
Biilit agguaqatigiissillugu ukiut 15-it atorneqartarput, biilinillu piginnittut ukiut tamaasa ukiumut 350 koruuninik akiitsuuteqartarunik, biilimik isaterneqarnissaat namminneerlutik akilertassavaat.
Kommuneqarfik Sermersuup naatsorsuutai naapertorlugit biilimik isaterineq 5000 koruunit missaannik akeqarpoq.
