Biiliuteqarnermut akitsuutit qaffassapput
- Akileraarutip procentimik ataatsimik apparniarnera qineqqusaarutaannaavoq, Siumup politikkikkut oqaaseqartartua Per Berthelsen oqarpoq 2013-mut aningaasanut inatsisissatut siunnersuut inatsisartut ippassaq oqaluuserimmassuk.
Inuiaqatigiinnili allannguiniarnerit eqqortumik naammassineqassappata, isertitanit akileraarutip appartinneqarnerata kingunerisaanik, Nunatta karsiata ukiumut annaasassaat, 70 million koruunit missaanniittussat, matussuserniarlugit qamutit motoorillit akitsuutaat qaffatsinneqartariaqartoq kiisalu avataasiorlutik aalisartut qaleralittaannik akitsuusiinertigut matussuserneqaratariaqartut, Aningaasaqarnermut Naalakkersuisup, Maliina Abelsen ullumi saqqummiussinissamini tunngavilersuutigisassaasa ilagaat.
Akitsuusiinerit inuiaqatigiit ilaannut malunnaataasussat ilaat tassaavoq, qamutit moroorillit oqimaassusaat assigiinngitsut aallaavigalugit qaffaanerit. Soolu biilit 1.500 kiilut angullugit oqimaassusillit akitsuutaat ukiumut 12.142 koruuninut qaffatsinneqassaaq, maanna taakkununnga 10.049 koruunit akiliutigineqartaraluartut, tassa qaffaaneq 17,2 procentiulluni.
Avataasiorlutik qaleralinniat pisaasa akileraaruserneqarnissaat, Maliina Abelsenip aamma siunnersuutigaa.
- Ataatsimut aalisagartassanik atorluaaneq tamatsinnut siunissami iluaqutaassaaq. Taamaattumik aalisakkat nunatsinni pisat nunani allani suliarineqartartussat akileraaruserneqartarnissaat pissusissamisoorpoq, Maliina Abelsen ullumi saqqummiussinissamini ilaatigut taama tunngavilersuivoq.
Akileraarusersorneqartussat allat tassaassapput, 2025-mi inuiaqatigiit atugarissaarnerulernissaannut peqataanngitsut, soorlu suliaqarani isertitat, tassani pineqarlutik inuit sulinatik aningaasanik iluanaarniartartut imaluunniit akeqanngitsumik ajunngitsorsiaqartartut.
Inatsisartut ullumi ataatsimiinnerat nalunaaqutaq ataatsimut aakllartippat tassa tamakku ilaatigut oqaluuserineqartussat.