Bidenip siusinnerusukkut Hawaiiliarsimannginnini isornartorsiorneqaatigereerlugu tikeraarnissi neriorsuutigigaa
USA-mi naalagaaffik Hawaii piffissami qaninnermi tikeraarniarlugu, USA-p præsidentiata Joe Bidenip maanna neriorsuutigaa.
Hawaiimi orpippassuit qanittukkut ikuallammata inuit 101-it ajunaarput, ajunaartullu amerlanerusinnaanerat ernummatigineqarpoq.
Tuluit nutaarsiassaqartitsiviat BBC taama allappoq.
Biden periarfissaq siulleq atorlugu Hawaiiliarniartoq, præsidentip illorsuata nalunaarutigaa. Bidenip siusinnerusukkut Hawaiiliarsimannginnini isornartorsiorneqaatigaa.
Hawaiimi orpippassuit ikuallannerat ima annertutigaaq USA-mi ukiut kingulliit 100-t ingerlaneranni aatsaat taama annertutigalutik. Inuit 1300-t maqaasineqarput.
USA-mi naalagaaffik Hawaiimi ajunaarnersuaqarnerani aqutsinerliortutut isornartorsiorneqarpoq.
Biden Hawaiimi ajunaarnersuaqarnerani ajunaartut amerliartornerat pillugu BBC-mit sapaatit akunnerata naanerani aperineqarpoq, Bidenilu tassunga atatillugu oqaaseqarusunnani akivoq.
Annaassiniartartut sulinerat akornusersorniarnagu Hawaiiliarsimannginnini Joe Bidenip marlunngornermi oqaatigaa.